Një grua, nënë dëshmori u dhunua dhe u përqesh nga një infermiere dhe dy shoqet e saj, brenda një qendre azili privat në Pejë. E moshuara që duhet të merrte ndihmë, kishte rënë pre e një episodi keqtrajtimi nga infermierja Aurona Pelaj, ndërsa mediat zbulojnë se skandali është edhe më i thellë se kaq. Iinfermierja Aurona Pelaj ka dhunuar të moshuarën në mënyrë çnjerëzore, teksa koleget e saj, nuk kanë ndërhyrë. Ngjarja ka ndodhur më 29 tetor, por është bërë publike një ditë më parë.
Gruaja që u dhuna nga infermierja e qendrës është nëna e një ushtari të UÇK, që ka dhënë jetën në luftën me Serbinë. Ajo është nëna e Taulant Reshat Nura, dëshmori që ra në Betejën e Qabratit. Ngjarja e rëndë e ndodhur në Qendrën për të Moshuar “Orenda” në Pejë, ka tronditur opinionin publik, teksa vajza në dëshminë e saj në polici ka treguar se “është vetëmbrojtur, pasi e moshuara e ka sulmuar e para”.
Videoja ku shfaqej ushtrimi i dhunës ndaj një të moshuare është publikuar fillimisht në formë denoncimi nga aktorja e njohur Kaltrina Zeneli. Në një lidhje direkte për “Opinion” në Tv Klan, aktorja Zeneli tregon se videoja i ka mbërritur nga një person i panjohur, i cili i ka kërkuar se ku mund ta denoncojë si rast.
“Më ka ardhur prej një personi të panjohur, dhe më ka pyetur se si mundet ta denoncojë një dhunë që ka ndodhur në një vend. Dhe përgjigjia ime ka qenë që ta thërrasë policinë.
Thashë se ata të drejtojnë dhe të thonë se çfarë duhesh të bëjnë më tutje. Më tha a mund të më gjesh një numër që merret me këtë gjë, dhe më vonë thashë të pyes. Ma ka dërguar vetëm videon dhe nuk është bërë më pastaj person i i gjallë dhe më është lutur që të mos e tregoj.
Fillimisht kur e hapa, thashë së çfarë paska ndodhur dhe më pas jam shtangur dhe më kanë filluar kolegët të më pyesin çfarë ka ndodhur dhe unë s’kam mundur të jap asnjë përgjigje. E kam ndaluar videon, nuk e kam shikuar deri në fund dhe më pas isha unë personi që nuk dija se kujt t’i drejtohem.
E bëra publike në rrjetet e mija sociale dhe nisa të etiketoj mediat tona, unë menjëherë e merrja dhe e vendosja në status, më pas disa prej kolegëve tonë dhe ju kam thënë që merreni këtë rast dhe shqyrtojeni dhe faleminderit të gjithë personave që nuk kanë ngurruar dhe janë nisur në vendin e ngjarjes. Personat që kanë ushtruar dhunë janë aty ku duhet të jenë”.
