Rreth dy vite më parë UEFA vendosi një dënim në drejtim të Skënderbeut, duke e përjashtuar nga kompeticionet Europiane. Pas këtij përjashtimi ishte kërkuar që edhe Prokuroria vendase të kryente hetimet për të ndëshkuar personat përgjegjës. FSHF kishte depozituar në instancat përkatëse raportet e sjella nga UEFA, e cila me bindje të plotë dënoi me 10 vite pezullime dhe 1 milion euro gjobë.
Disa muaj më parë, Prokuroria mori në pyetje lojtarë, trajnerë dhe drejtues të skuadrës korçare në lidhje me dyshimet e ngritura për fiksim apo paracaktim rezultatesh, akuzë që vinte paralelisht me atë të grupit të strukturuar kriminal.
Ky është një proces që ka zgjatur rreth dy vite dhe, me sa duket, të gjitha raportet e UEFA-s apo edhe deklaratat e lojtarëve nuk kanë siguruar asnjë provë për Prokurorinë, që të kthehet në akuzë për lojtarët, drejtuesit apo klubin korçar.
Për këtë arsye, së fundi Prokuroria ka vendosur që të kërkojë informacion edhe nga disa shtete të ndryshme, ku ndodhen kompani ndërkombëtare bastesh të cilësuara si të dyshuara, e sipas UEFA-s mund të jenë luajtur këto ndeshje që janë në raporte.
Pritet informacion nga Indonezia, Malajzia, Malta dhe disa vende të tjera të lindjes, për ndeshjet kombëtare dhe ndërkombëtare të zbardhura nga sistemi “BFDS” i UEFA-s në raportet e paraqitura.
