Kreu i grupit parlamentar, Edi Paloka iu përgjigj reagimit të Kryeministrit, Edi Rama mbi vendimin që mori sot Gjykata e Lartë, e cila e gjobiti atë me 500 mijë lekë, për shpifje ndaj ish ministrit të Brendshëm, Saimir Tahiri.
Rama në reagimin e tij paralajmëron se ky është vetëm fillimi i efektit të vettingut, ndërsa shkruan: “Një lajm i mirë ndëshkimi i rradhës nga Gjykata e Lartë për shpifësin profesionist të PD, por s’kemi parë gjë akoma…po vjen Vettingu”.
Ndërsa Paloka në një prononcim për “Tirana Today”, theksoi se Gjykata ishte nën presion nga bosi i Tahirit, ndaj tha ai, “Kjo është arësyeja pse ne nuk lejojmë e nuk do të lejojmë që drejtësia të mbetet në duart e Ramës dhe kujtdo pushtetari tjetër”.
Ndërkohë Paloka vijoi t’u qëndrojë akuzave të tij ndaj Saimir Tahirit dhe Edi Ramës.
“ Gjithë opinioni publik shqiptar dhe ndërkombëtar tregojnë me gisht qeverinë “Rama” dhe drejtëpërdrejtë Sajmir Tahirin, si autor të kanabizimit të Shqipërisë dhe lidhjeve me krimin” shprehet Paloka, ndërsa kujton se edhe pasuesi në detyrë, Fatmir Xhafa e drejtoi gishtin tek Sajmir Tahiri.
“Shkëputja e lidhjeve të qeverisë me krimin, është një nga arësyet madhore pse ne protestuam dhe realizuam qeverinë teknike. Fitorja e PD-së më 25 qershor do të jetë mbyllja e historisë së republikes së vjetër dhe fillimi i asaj që pret çdo shqiptar”, përfundon reagimin e tij Edi Paloka.
Padia e ish ministrit të Brendshëm, Sajmir Tahiri ndaj Edi Palokës është bërë që në vitin 2015, me akuzën për shpifje, pasi ky i fundit e ka akuzuar si të lidhur me bandat kriminale.
(TIRANA TODAY)
