Në finalen e Champions League, një duel mes Mohamed Salah dhe Sergio Ramos nxori të dëmtuar nga fusha egjiptianin. Kjo gjë zemëroi padyshim tifozët e Liverpool, por edhe një komb prej 95 milionë banorë. Akuza të shumta kanë vërshuar pafund në drejtim të kapitenit madrilen, madje dhe kërcënime, pavarësisht se Ramos u shpreh se ishte e paqëllimshme dhe ndodhi gjatë një dueli.
Por, një avokat në Kajro ka vendosur t’i shkojë më tutje kësaj çështje. Ai nuk është kufizuar vetëm me akuzat, por njoftoi se do të ngrejë një padi ndaj Sergio Ramos ku si dëmshpërblim do të kërkojë 1 miliardë euro. “Ramos dëmtoi me dashje Mo Salah dhe duhet të ndëshkohet për veprimet e tij. Do të kërkoj kompensim, që mund të tejkalojë 1 miliardë eurot për dëmtimin fizik dhe psikologjik që Sergio Ramos i shkaktoi Mo Salah dhe popullit egjiptian”, deklaroi Bassem Wahba në një televizion vendas.
Ndërkohë, peticioni i nisur online për të ndëshkuar Sergio Ramos ka arritur mbi 300 mijë firma të grumbulluara në pak orë dhe numri vazhdon të rritet me ritme të shpejta. Në internet janë të shumtë ata që flasin për një dëmtim me dashje nga ana e Sergio Ramos, por vetë lojtari spanjoll e ka mohuar këtë.
