Lëndimi në stërvitje i Kevin De Bruyne duket se është mjaft i rëndë. Ylli belg ditën e sotme ka udhëtuar drejt Barcelonës për të ekzaminuar me detaje lëndimin që kishte pësuar në ligament dhe merr lajmin më të keq të mundshëm. 27-vjeçarit i është përsëritur i njëjti lëndim që kishte pësuar në vitin 2016-të dhe e la dy muaj jashtë fushave.
Por këtë herë do të jetë një mungesë me e gjatë. Manchester City dhe Guardiola do tu duhet ti bëjnë llogaritë edhe njëherë kur sezoni sapo ka nisur. Dëmtimi i De Bruyne në ligament nuk kërkon ndërhyrje me operacion, por mungesa e tij mund të jetë për rreth 18 ndeshje, gjysmën e kampionatit. Alternativat që Guardiola ka në pozicionin e yllit belg janë Gundogan dhe Bernardo Silva, por ai e di që është e vështirë të zëvendësosh një lojtar të tillë.
Ylli belg ishte një nga lojtarët kryesorë tek ‘qytetarët’ në sezonin që lamë pas dhe mungesa e tij i rrit shanset e rivalëve për të synuar që të rrëzojnë Cityn nga froni.
