Qeveria e Kosovës duke u konsultuar me ekspertët dhe analistë kanë hedhur idenë se çështja e demarkacionit të kufirit ndërmjet Kosovës dhe Malit të Zi të shkojë në arbitrazh ndërkombëtar. Kjo kërkesë është hedhur menjëherë poshtë nga ministri i Punëve të Jashtme të Malit të Zi, Srdjan Darmanoviç, i cili ka dalë kundër dërgimit të marrëveshjes në arbitrazh duke ia mbyllur kështu qeverisë së Kosovës edhe një derë tjetër, që e shihte si opsion për dalje nga situata.
Së fundmi, qeveria e Kosovës ka pasur dy qëndrime. Përderisa kryeministrit Ramush Haradinaj thotë se marrëveshja e demarkacionit nuk do të ratifikohet ashtu siç është nënshkruar në vitin 2015 dhe se do të rinegociohet pas punës së komisionit të angazhuar për rishikim të kufirit.
Por nuk mendon kështu ministri i Jashtëm i Kosovës, Behgjet Pacolli, i cili në mbledhjen e komision për Punë të Jashtme tha se për Malin e Zi, demarkacioni është punë e kryer dhe e panegociueshme.
Gazeta Express i kishte dërguar pyetje Qeverisë së Malit të Zi rreth mundësisë së dërgimit të marrëveshjes se demarkacinonit të kufirit në Gjykatën e Arbitrazhit, e ajo si përgjigje i ka kthyer deklaratën e ministrit Darmanoviç, i cili thotë se për shtetin e tij ka përfunduar çdo gjë rreth kufirit.
Darmanoviç: Sa i përket arbitrazhit eventual ndërkombëtar, për arbitrazh duhet pajtimi i dy palëve, e unë u kam thënë se ne këtë punë e kemi kryer. Nuk kam çfarë t’i shtojë asaj që kam thënë disa herë rreth kësaj teme. Ne kemi bërë gjithçka që është dashur të bëjmë.
Ai ka shpjeguar se Mali Zi ka shkuar sipas procedurave të nevojshme, duke e finalizuar me ratifikimin e marrëveshjes në Parlamentin e tij. Kjo është edhe pika e fundit e angazhimit të Malit të Zi rreth kufirit me Kosovën.
Darmanoviç: Në Vjenë e kemi nënshkruar marrëveshjen ndërkombëtare me Kosovën në mirëbesim dhe këtë marrëveshje e kemi ratifikuar në mënyrë të rregullt në Parlament siç udhëzojnë normat dhe zakonet e së drejtës ndërkombëtare.
Darmanoviç nuk i jep asnjë mundësi anulimit të marrëveshjes që është miratuar në Parlamentin e tyre, pasi siç thotë ai, kjo nuk ka ndodhur asnjëherë në shtetin e tyre.
Përveçse nuk do të marrin asnjë hap tjetër për demarkacionin, ministri i Jashtëm thotë nuk do t’i bëjnë presion Kosovës dhe se do të presin derisa kjo të zgjedh këtë çështje në Kuvend.
Darmanoviç: Natyrisht ne jemi të durueshëm që të presim zhvillimin eventual të ngjarjeve në Kosovë pasi kjo është çështje e brendshme e tyre. Nuk duam të bëjmë asnjë presion e as të shkaktojmë ndonjë atmosferë rreth asaj se kur do ta gjejë parlamenti i Kosovës formulën me të cilën do ta ratifikojë këtë marrëveshje ndërkombëtare.
Se shteti malazias është rehat, ministri përmend faktin se edhe Shtetet e Bashkuara të Amerikës dhe Bashkimi Evropian kanë qëndrim të njëjtë me Malin e Zi.
Siç e keni parë një qëndrim identik me Malin e Zi e kanë edhe BE edhe SHBA kështu që qëndrimi ynë nuk është asgjë befasuese dhe asgjë e re”.
Kosovës i kanë ardhur mesazhe nga figurat e institucionet më të rëndësishme të ratifikimit të demarkacionit në Kuvend, dhe varshmërinë e liberalizimit të vizave me kalimin e demarkacionit.
