Kryeministri i Kosovës, Ramush Haradinaj ka dalë kundër Brukselit, teksa e ka cilësuar “fatkeqësi” kushtëzimin e liberalizimit të vizave me ratifikimin e Demarkacionit.
“E shoh si fatkeqësi që BE-ja e ka ndërlidhur liberalizimin e vizave me këtë çështje. Sepse në vend që për politikë një shoqëri po sanksionohet për shkak të një marrëveshjeje kufitare. Ky nuk është një trajtim i mirë për një komb që ka kaq shumë ndjenja proeuropiane”, tha shefi i qeverisë së Shkupit, gjatë një interviste për Tagesspiegel.
Haradinaj nuk është tërhequr nga bindja se vija e Demarkacionit është gabim, teksa tha se Kosova humbet territor, prandaj po mundohet të gjejë një zgjidhje tjetër për marrëveshjen me Malin e Zi:
“Shumë ekspertë besojnë që në atë marrëveshje është bërë një gabim dhe Kosova humbet territor. Pasi që në Parlament duhen dy të tretat e nevojshme për aprovim, jam duke kërkuar rrugë për të gjetur bindjen që ky territor është i sigurt”.
Po ashtu, kryeministri i Kosovës ka folur dhe për Specialen, duke e konsideruar kërkesën për zhbërjen e saj si diçka demokratike.
“Iniciativa ka qenë një shprehje e jetës demokratike të parlamentit tonë. Mendimet e deputetëve nuk janë gjithmonë shprehje e obligimeve dhe marrëveshjeve ndërkombëtare. Mirëpo iniciativa nuk pati sukses, pra nuk do të ketë një epilog. Njëkohësisht kritika për Gjykatën Speciale ndahet nga shumë jurist”.
Në prag të përvjetorit jubilar të pavarësisë, Haradinaj e ka quajtur normale rrugëtimin e vështirë që po kalon Kosova si shtet i ri.
“Lindja e një kombi nuk është proces i lehtë. Kosova ka mësuar një mori leksionesh. Ne duhet ta përmirësojmë punën qeverisëse, shtetin e së drejtës, ekonominë. Ne jemi aty ku jemi. Mirëpo ne nuk dorëzohemi dhe duhet t’u dalim në ballë problemeve. Sepse ky është vendi ynë dhe një vend tjetër për të jetuar nuk e kemi”.
