Ditën e sotme, në orën 10:00 ka nisur seanca e jashtëzakonshme në Kuvendin e Kosovës, me rend dite ratifikimin e marrëveshjes për demarkacionin me Malin e Zi.
Por, ende pa nisur seanca jashtë Kuvendit të Kosovës janë mbledhur disa qytetarë që po protestojnë kundër Lëvizjes Vetëvendosje, teksa mbështesin marrëveshjen për demarkacionin me Malin e Zi.
Ndërkohë, një incident ka ndodhur gjatë protestës, ku një person ka qëlluar me vezë kryetarin e Lëvizjes Vetëvendosje, Albin Kurtin. Policia e Kosovës ka ndërhyrë menjëherë, ku ka arrestuar shtetasin e identifikuar si Bashkim Fazliu, i cili ka ofenduar e më pas ka sulmuar Kurtin.
Ky i fundit është shprehur publikisht kundër ratifikimit të marrëveshjes për demarkacionin, pasi e konsideron të padrejtë atë. Veç Lëvizjes Vetëvendosje, edhe Lista Serbe ka deklaruar se do votojë kundër marrëveshjes.
Ratifikimi i marrëveshjes për demarkacionin me Malin e Zi pritet që t’i hapë rrugë nisjen e negociatave për integrimin e Kosovës në BE.
Pas incidentit, mediet kosovare shkruajnë se seanca e sotme do të shtyhet sërish.
