Debati mes Ilir Demalia dhe deputetit te PS-se, Fidel Ylli, vijon me replika në media. Pas përgjigjes që Ylli i dha Demalias përmes një interviste në “Panorama”, reagon ky i fundit.
Demalia nxjerr emrat e personave të njohur, që kanë qenë dëshmitarë në ngjarjen e vitit ’95, kur sipas tij, Tom Doshi e Ylli e kanë kërcënuar me pistolete.
Përgjigjen e tij rreth intervistës sime te “Panorama” në lidhje me incidentin në “Bar West”, Fidel Ylli e fillon me fjalët: “Ky është një mashtrim i Demalisë”.
1- Besoj që dhe nga vetë ajo që shkruan Fideli, biem dakord që ngjarja ka ndodhur. Nuk e di se sa i sinqertë do të jetë sot Gjergj Jorgo, ish-shefi Rajonit Nr.3 të Tiranës që të tregojë e të thotë të vërtetën e kësaj ngjarjeje. Nuk po zgjatem për arsyet pse ai nuk mund të mos jetë i sinqertë, e di ai, e di edhe unë, e di mirë Fideli si ruhej lokali i tij nga Rajoni Nr.3, jo për ta përgjuar nga SHIK-u, por për ta ruajtur atë!
2-Nuk besoj se do të gënjejë Gjergj Lezhja, i cili është gjallë dhe e di se si më kërkuan të lëshoj denoncim për kërcënim jete ndaj meje, ku përgjigjja ime ishte “JO”, duke i thënë se i zgjidh vetë këto punë. Kjo në sy të Lezhjes dhe ish- zv.ministrit të Brendshëm Agim Shehu.
3-Nuk di a do të jetë i sinqertë të kallëzoj ngjarjen siç ka ndodhur Fatos Baxhaku? E di që nuk do ta tregojë ashtu siç ka ndodhur Ben Blushi.
Sot Fidel Ylli mund të blejë postin e deputetit, gjykatat, prokurorët, Policinë dhe administratën, por jo të vërtetën.
4-Për një gjë jam i sigurt, që do të kallëzoj të vërtetën dhe vetëm të vërtetën miku im Hektor Pustina, të cilin e kam provuar në ditë të vështira kur hante shkopat e gomës të shokëve të Fidelit, e kjo do të thotë të përbindëshave të Repartit Special të 326-ës, që kanë sakatuar rininë në revoltat e vitit 1990 në Kavajë, Shkodër dhe Tiranë, me shkopa gome e lopata xheniere duke larë me gjak rrugët e këtyre qyteteve. Pjesëtar i këtyre forcave ka qenë edhe Fidel Ylli për vite me radhë.
