Arkimed Lushaj përfundoi në prangat e policisë të mërkurën. Sipas policisë ai ishte pjesë e një grupi kriminal që operonte në Tiranë. Ky grup akuzohet për trafikimit të narkotikëve dhe krime kundër personit.
Në një njoftim zyrtar për mediat, Policia e Shtetit thotë se arrestimi i reperit 31-vjeçar, të njohur si Stresi, erdhi pas një hetimi disa mujor. Ndalimi i tij u bë në bashkëpunim me Prokurorinë e Tiranës. Gjykata kishte dhënë masën e sigurisë “arrest me burg” për të.
Lushaj u arrestua në ambientet e një hoteli në Linzë. Gjatë kontrollit, policia i gjeti atij një pistoletë, 12 fishekë, si dhe një sasi kokaine.
“Këtij shtetasi në ambjentet e një hoteli të ndodhur në vendin e quajtur Linzë gjatë kontrollit të ushtruar i janë gjetur dhe sekuestruar në cilësinë e provës materiale një sasi e vogël lënde narkotike e dyshuar kokainë, një armë zjarri pistoletë e tipit “Pjetro Beretta” , si dhe 12 fishekë të modelit 7.65 mm”, sqaron policia.
Për rastin, autoritetet policore kanë nisur gjithashtu një procedim penal në gjendje të lirë për akuzën e moskallëzimit të krimit, ndaj një vajze 20-vjeçare me iniciale P. Ç.
