Ivana Trump vdiq nga plagët që mori, pasi u rrëzua nga shkallët e apartamentit të saj në Nju Jork të enjten, tha Ekzaminuesi Mjekësor. Vdekja e saj është cilësuar si aksident.
Ekzaminuesi Mjekësor ka përcaktuar se shkaku i vdekjes së saj ishte një aksident i shkaktuar nga dëmtimet e mprehta në bustin e saj. Ajo ishte 73 vjeç.
Policia iu përgjigj një thirrje të një personi në arrest kardiak në orën 12:40, dhe burime policore thanë se Ivana Trump u gjet pa ndjenja në fund të shkallëve.
Familja Trump lëshoi një deklaratë që konfirmoi vdekjen e saj. “Me pikëllim të thellë njoftojmë ndarjen nga jeta të nënës sonë të dashur, Ivana Trump”, shkruhet në të. “Nëna jonë ishte një grua e jashtëzakonshme, një forcë në biznes, një atlete e klasit botëror, një bukuri rrezatuese dhe nënë dhe mike e kujdesshme. Ivana Trump ishte një e mbijetuar. Ajo iku nga komunizmi dhe përqafoi këtë vend”.
Eric Trump, fëmija më i vogël i Ivana-s dhe Donald Trump-it, u largua nga ndërtesa ku jetonte nëna e tij vetëm disa minuta para se të merrej trupi i saj, duke thënë se ishte një ditë e trishtuar për familjen.
Vajza e Ivana Trump, Ivanka, shkroi në Twitter dhe tha se ishte: “Zemërthyer nga vdekja e nënës sime. Mami ishte brilante, simpatike, pasionante. Ajo e jetoi jetën në maksimum, duke mos e harruar kurrë një mundësi për të qeshur dhe kërcyer. Do të më mungojë përgjithmonë dhe kujtimin e saj do ta mbaj gjallë gjithmonë në zemrat tona”.
Ivana Trump u martua me Donald Trump në vitin 1977, dhe megjithëse nganjëherë dukej se mbetej në hije nga bashkëshorti i saj i famshëm, ajo ishte gjysma e çiftit të pushtetit të viteve 1980, duke shërbyer pranë tij në Organizatën Trump si zëvendëspresidente për dizajnin e brendshëm.
Ajo gjithashtu menaxhoi Hotelin Plaza, një nga pronat kryesore të familjes. “Jam shumë i pikëlluar të informoj të gjithë ata që e donin, prej të cilëve ka shumë, se Ivana Trump ka ndërruar jetë në shtëpinë e saj në New York City”, postoi Donald Trump. “Ajo ishte një grua e mrekullueshme, e bukur dhe e mrekullueshme, e cila bëri një jetë të mrekullueshme dhe frymëzuese. Krenaria dhe gëzimi i saj ishin tre fëmijët e saj, Donald Jr., Ivanka dhe Eric. Ajo ishte aq krenare për ta, ashtu siç ishim të gjithë ne; krenare për të. Pusho në paqe, Ivana!”.
Martesa e tyre e trazuar dhe divorci u bënë objekt i interesit publik mbarëbotëror, pasi lidhja e Donald Trump me Marla Maples u bë publike dhe ndarja e tyre u finalizua në vitin 1992.
Divorci i saj e bëri heroinë për gratë e refuzuara kudo, duke i dhënë asaj një rol në filmin e vitit 1996 “The First Wives Club”, ku ajo u tha personazheve: “Mos u inatosni, merrni gjithçka”. Ivana Trump u martua katër herë, një herë para Donaldit dhe dy herë më pas.
Pas divorcit, ajo zhvilloi linjat e saj të veshjeve, bizhuterive dhe produkteve të bukurisë. Ajo ishte autore e disa librave, i fundit i quajtur “Raising Trump”, dhe gjithashtu shkroi një rubrikë këshillash. Para publikimit të “Raising Trump”, ajo foli me ABC News dhe tha se ende fliste me ish-bashkëshortin e saj rreth një herë në dy javë dhe se kishte një “numër të drejtpërdrejtë” në Shtëpinë e Bardhë.
“Unë (nuk) dua ta thërras atë atje, sepse Melania është atje,” tha ajo në atë kohë, duke iu referuar zonjës së parë Melania Trump. “Dhe nuk dua të shkaktoj asnjë lloj xhelozie apo diçka të tillë, sepse në thelb jam gruaja e parë e Trump. OK? Unë jam zonja e parë”.
Libri dokumentoi rrugëtimin e saj nga rritja nën sundimin komunist në ish-Çekosllovaki, tek martesa me një president të ardhshëm të SHBA-së dhe rritja e tre fëmijëve së bashku.
Burimi i lajmit: ABC7. Përshtatur nga Tirana Today
