Në një kohë kur studentët e Juridikut vijojnë ngujimin në ambientet e këtij fakulteti, në shenjë proteste për plotësimin e kërkesave të tyre, duket se dekani i këtij fakultetit po merr masa për nisjen e mësimit sa më parë.
Dekani i Juridikut, Artan Hoxha i ka dërguar Ministrisë së Arsimit, Sportit dhe Rinisë një kërkesë, ku kërkon ambiente të reja për zhvillimin e procesit mësimor.
“Duam ambiente të tjera për të bërë mësim, pasi këtë e kërkon shumica e studentëve. Ambientet tona ne i kemi të bllokuara për shkak të ngujimit të një pjese studentësh.” -thuhet ndër të tjera në kërkesën e dekanit.
Kujtojmë se gjatë ditës së sotme pati përplasje mes grupit të studentëve të ngujuar me ata që kërkojnë të bëjnë mësim dhe nuk duan të humbasin vitin akademik.
