Hekurudhat Shqiptare sh.a, enti publik që menaxhon hekurudhat në të gjithë vendin prej vitesh nuk është financiarisht në nivelet e pritshmërive. Kompania publike po has edhe një rënie të të ardhurave dhe vijon të rezultojë me humbje të larta. Ndërkohë që rrjeti hekurudhor ka nevojë për të paktën 200 milionë euro për tu rikthyer në parametra optimalë.
Në fund të vitit 2016, të ardhurat e Hekurudhës ishin në total 564 milionë lekë, (të ardhurat e shfrytëzimit plus të tjera), apo rreth 4.1 milionë euro, me një rënie prej 27% në raport me të njëjtën periudhë të vitit të kaluar.
Për shkak të vjetërsimit të tejskajshëm të mjeteve, kompania ka një normë mjaft të lartë amortizimi, teksa zhvlerësimi i aktiveve afatgjata ishte 525 milionë lekë, pothuajse sa të ardhurat.
Duke i shtuar amortizimit të lartë edhe shpenzimet e personelit prej rreth 400 milionë lekësh (plus 27 milionë lekë shpenzime financiare), kjo ka bërë që kompania të rezultojë me humbje të mëdha, në 538 milionë lekë në vitin 2016 (rreth 4 milionë euro). Megjithatë, për shkak të reduktimit të shpenzimeve të personelit dhe rënies fortë të shpenzimeve për interesa, humbjet janë ulur me 32 për qind.
Aktualisht hekurudhat shqiptare konsiderohen një “gropë e zezë” në buxhet pasi subvencionohet pothuajse çdo vit. Prej vitesh ajo rezulton me humbje të mëdha dhe humbjet e akumuluara në kapitalin e kompanisë ishin 4.6 miliardë lekë, apo rreth 33 milionë euro, shkruan Monitor.
Një nga planet e lakuara ishte ajo e dhënies me koncesionin të disa pjesëve të kësaj hekurudhe por kjo deri më tani është bërë e mundur vetëm për dy linja shumë të shkurtra si Fier-Ballsh dhe Fier-Vlorë që menaxhohet nga kompania Albstar për një vlerë investimi 20 milionë dollarë.
Sipas të dhënave të INSTAT për muajin korrik 2017, përmes hekurudhës janë transportuar mbi 90 mijë ton mallra, kurse nga janari në korrik janë transportuar 40 mijë pasagjerë, numër që në raport me një vit në parë është ulur me rreth 50 %.
