“Defender 21”/ Qindra mjete ushtarake zbarkojnë në portin e Durrësit (Video)

Në portin e Durrësit vijon zbarkimi i trupave dhe i mjeteve amerikane në prag të stërvitjes së NATO-s, “Defender Europe 21”.

Ministri i Mbrojtjes Niko Peleshi ka publikuar një video në rrjetet sociale, ku shihen mjetet e shumta amerikane, teksa theksoi se çdo gjë është gati për të çelur stërvitjen.

“Nga porti i Durrësit ku vazhdon me ritëm zbarkimi i trupave dhe mjeteve amerikane. Gjithcka gati për të celur stërvitjen e përbashkët më të madhe, të zhvilluar në Shqipëri, nga ushtria amerikane dhe forcat tona të armatosura në kuader te NATO,  Defender Europe 21,” shkruan Peleshi në postimin e tij.

Në stërvitje do të marrin pjesë mbi 17 mijë trupa amerikane dhe 14 mijë të tjera nga 26 vende anëtare të NATO-s, që do të vënë në dispozicion të stërvitjes edhe mjete ushtarake.

Sipas Ministrisë së Mbrojtjes, 4 mijë ushtarë amerikanë do të vendosen në Shqipëri dhe pjesa tjetër do të zhvendoset në vendet fqinje.

Shqipëria vlerësohet si një aleate e palëkundur e NATO-s, ku u anëtarësua para 12 vitesh, në Prill të vitit 2009.

Vendi ynë po investon në forcimin e gatishmërisë për mbrojtjen kolektive të NATO-s, në bashkëpunim të ngushtë me SHBA për të përmirësuar aftësitë e Forcae të saj të Armatosura.