Ish-presidenti Bujar Nishani, i ftuar në studion e emisionit “Natë me Xhaxhiun”, ka komentuar çështjen e ndjeshme mes presidentit dhe kryemimistrit lidhur me Sandër Lleshin. Ai dha një sërë arsyesh se pse Meta nuk duhet ta dekretojë Lleshin. Nishani e justifikon me faktin se propozimi i kryeministrit për z. Lleshi është antikushtetues. Por nuk qëndron këtu ngërçi. Bujar Nishani shton më tej se në 5 vjet, ndonëse ka pasur statusin e ushtarakut aktiv, është emëruar në një post politik. Një tjetër arsye lidhet me marrjen e dy pagave. Z. Lleshi ka marrë dy paga nga shteti. Të marrësh dy paga nga shteti, përbën shkelje penale.
“E para sot, vetë presidenti e shprehu në mënyrë publike qëndrimin e tij, për shkak të një presioni aspak etik ndaj presidentit, se propozimi i kryeministrit për z. Lleshi është antikushtetues.
Pra një ushtarak aktiv, nuk e plotëson kushtin që të jetë deputet. E rrjedhimisht as që të jetë ministër. Por ka edhe probleme të tjera. Sepse së pari, ky ushtarak sot pas 5 vitesh kur ka qenë në një funksion politik, ai ka shkelur kushtetutën në mënyrë shumë të rëndë. Se në 5 vjet ndonëse ka pasur statusin e ushtarakut aktiv, është emëruar në një post politik. Shqipëria dhe Korea e Veriut kanë Ministrat e Brendshëm ushtarakë.
Së treti, ka marrë dy paga nga shteti. Dhe të marrë dy paga përbën shkelje penale. Ndonëse presidenti nuk ka detyrë emërim ministrash, pasi është e drejtë e kryeministrit, por presidenti është ai që garanton që të mos shkelet Kushtetuta”, u shpreh ish-presidenti.
I pyetur se si mund të veprojë presidenti me këtë kandidaturë, ai tha se hapësirat i ka vetëm Kushtetuta. Nëse Lleshi largohet nga statusi i ushtarakut aktiv, atëherë duhet parë Kushtetuta, pasi sipas tij, ajo i krijon hapësirat.
“Pa dyshim, hapësirat i ka vetëm Kushtetuta. Kushtetuta zbatohet, lexohet dhe interpretohet nga Gjykata Kushtetuese. Nëse ai largohet nga statusi i ushtarakut aktiv, atëherë duhet parë Kushtetuta. Ajo i krijon hapësirat.
Veprimin legjistlativ dhe juridik zotëria e ka të mangët. Sepse ai duhet ta dijë se në çdo rast, ai duhet të shkojë tek eprori për ti dorëzuar çfarëdolloj kërkese. Në këtë rast atë të daljes në lirim. Pas kësaj, është Shefi i Shtabit të Përgjithshëm ai që ia drejton këtë kërkesë presidentit.
Jemi në një situatë ku shteti po shkërrmoqet. Shteti sot dikujt i merr pronën, dikujt i rrit taksat. Dikujt i thotë bëhu ministër pavarësisht çfarë thotë Kushtetuta, sepse kështu them unë. Jemi në një sistem kaotik anarkik”.
