Ish-trajneri i Kombëtares Shqiptare, Gianni de Biasi duket se është drejt marrjes së një tjetër ekipi kombëtar.
Së fundmi, ai u përfol për tratativa me klubin e Veronës, por duket se këto mbeten vetëm thashetheme.
Vetë De Biasi është shprehur se ka një mundësi për një ekip kombëtar, të cilën ai po e mendon, por nuk ka zbuluar emrin e përfaqësueses.
Ndër të tjera, ai ka thënë se nëse ka një ofertë nga një ekip fitues i Seria B, do e marrë patjetër në konsideratë.
“Nuk kam pasur dëshirë të trajnoj dhe kam lënë pas 2 shanse të mira si Frosinone dhe Venecia. Për sa i përket Veronës nuk kam pasur asnjëherë kontakte. Megjithatë kam një mundësi për një ekip kombëtar. Po vlerësoj, nëse më duhet të stërvis një klub apo një kombëtare. Nëse vjen një ofertë nga një ekip fitues i Seria B, do ta marrë patjetër në konsideratë. Kam pasur një kontakt të rëndësishëm me një kombëtare, po e vlerësoj, të shikojmë”, u shpreh De Biasi.
