Daut Gumeni ka kryer ditën e djeshme një operacion të vështirë në zemër. Operacioni është realizuar në spitalin Amerikan nga mjeku kirurg Andi Kacani. Sipas burimeve të Tirana Today, shpenzimet e operacionit i ka mbuluar qeveria shqiptare.
“Aktualisht gjendja shëndetësore paraqitet mirë. Pacienti ka reaguar pozitivisht pas operacionit, ai është zgjuar mbrëmë. Për momentin ndodhet në reanimacion nën kujdesin e stafit profesionist, por situata është stabilizuar,” tha mjeku Kacani në një telefonatë për Tirana Today.
Daut Gumeni është figurë e qëndresës antikomuniste dhe e kulturës kombëtare shqiptare. Ai ka vuajtur për shumë kohë në burgjet komuniste dhe sot idealizohet për sfidën dhe luftën që i shpalli diktaturës përmes penës dhe forcës së fjalës. U arrestua kur ishte vetëm 24 vjeç dhe për 23 vjet vuajti dënimin e rreptë të të burgosurit politik.
Pas viteve ’90 ai ka punuar në disa poste të ndryshme shtetërore. Gumeni është shkrimtar, poet, përkthyes, publicist, eseist dhe diplomat.
Mesa duket Daut Gumeni e ka përballuar denjësisht edhe këtë sfidë të fortë dhe redaksia e Tirana Today i uron shërim të shpejtë.
