Situata e rënduar midis mazhorancës dhe sistemit të drejtësisë në Shqipëri ka filluar të alarmojë edhe Parlamentin Evropian. Kërkesa nga Prokuroria për arrestimin e ish-ministrit të Brendshëm, Saimir Tahiri, për dyshimet mbi përfshirjen e tij në trafikun e drogës midis Shqipërisë dhe Italisë ka futur në një spirale përplasjeje mazhorancën me organin e akuzës, Prokurorinë.
Për këtë arsye, faktori ndërkombëtar ka filluar ta shohë me shqetësim atë që po ndodh në Shqipëri. Kreu i Partive Popullore Evropiane, Joseph Daul e ka cilësuar gjendjen që po kalon Shqipëria si tejet të rëndë. Sipas tij, lufta kundër trafikut të drogës dhe krimit të organizuar duhet të merret seriozisht nga ana e qeverisë ndryshe rrezikohet procesi i integrimit.
E gjithë kjo situatë, sipas Daul, po cenon hapjen e negociatave, e kërkuar me aq ngulm nga qeveria shqiptare dhe kryeministri Edi Rama.
“Krimet që rrjedhin nga trafiku i drogës në Shqipëri përbëjnë një problem serioz dhe jashtëzakonisht shqetësues në rrugën e këtij vendi drejt Bashkimit Evropian. Në këtë mënyrë, nevojiten përpjekje reale për të luftuar krimet e këtij lloji me një transparencë të plotë”, shkruan Daul në twitterin e tij.
— Joseph Daul (@JosephDaul) October 24, 2017
Daul bëri një apel ndaj qeverisë shqiptare që të marrë seriozisht ndërtimin e një shteti ligjor, në të kundërt, vendi do të vijojë të mbetet larg integrimit në Bashkimin Evropian. “Aspiratat e Shqipërisë në integrimin evropian do të merren seriozisht vetëm kur të vendoset shteti ligjor, pavarësia e gjyqësorit dhe lufta kundër korrupsionit të bëhet konkrete”, shkruan më tej Daul.
— Joseph Daul (@JosephDaul) October 24, 2017
Ky është reagimi i dytë pas atij të Doris Pack. Ish-eurodeputetja gjermane e cilësoi qëndrimin e kryeministrit Rama si tejet dekonstruktiv pasi po pengon drejtësinë të bëjë punën e saj në hetimin ndaj ish-ministrit të Brendshëm, Saimir Tahiri. Këto janë qëndrimet e para që vijnë nga ndërkombëtarët, ndërsa diplomatët e atashuar në Tiranë ende nuk kanë komentuar situatën e rëndë, të cilët si duket nuk duan të përfshihen në një proces të tillë delikat, ku fjala do t’i takojë nesër Kuvendit dhe veprimeve të Prokurorisë ndaj çështjes “Tahiri”.
