Mbreti Charles III, në fjalimin e tij të parë si Mbret, i bëri homazhe nënës së tij Mbretëresha Elizabeth II, duke thënë se përkushtimi i saj ndaj shërbimit dhe popullit nuk u lëkund kurrë dhe “e përcaktoi tërë jetën e saj”.
“Ky ishte më shumë se një premtim. Ishte një angazhim i thellë personal që përcaktoi tërë jetën e saj”, tha ai.
Ai u shpreh se Mbretëresha bëri sakrifica dhe përkushtimi i saj mbeti i fortë “nëpër kohë ndryshimi dhe përparimi, për kohë gëzimi dhe festimi, dhe nëpër kohë trishtimi dhe humbjeje”.
Mbreti tha se gjatë jetës së saj në shërbim, dashuria e saj për traditën, por edhe përqafimi i saj i përparimit, e bënë atë të madhe.
“Dashuria, admirimi dhe respekti që ajo frymëzoi u bënë shenjë dalluese e mbretërimit të saj. Dhe siç mund të dëshmojë çdo anëtar i familjes sime, ajo i kombinoi këto cilësi me ngrohtësinë, humorin dhe një aftësi të pagabueshme për të parë gjithmonë më të mirën tek njerëzit”.
Burimi i lajmit: CNN. Përshtatur nga Tirana Today
