Boshatisja e Komunës ka bërë që kryetari i saj të ndërmarrë një nisë mjaft interesante. Kjo me synimin e rigjallërimit të qendrës historike dhe të ekonomisë së territorit.
Ky projekt po zhvillohet në Tarsia të Kozencës në Kalabri, ku banojnë pak më shumë se 2 mijë banorë.
Kështu, kreu i Komunës Roberto Ameruso ka vendosur që të bëjë pjesë të pasurisë komunale shtëpitë e braktisura dhe t’i japë ato me çmimin simbolik 1 euro, kryesisht për çiftet e reja.
“Kemi regjistruar pasuritë e paluajtshme që janë braktisur. Për momentin kemi regjistruar disa dhjetëra ndërtesa që janë pasuri e personave që nuk kanë më interes që t’i mbajnë sepse jetojnë prej kohës larg nga Kalabria. Kemi skicuar një rregullore për t’i marrë këto shtëpi e për t’i bërë pjesë të pasurisë komunale. Hapi i radhës do të jetë miratimi i një paketë për çiftet e reja,” ka thënë kryetari komunës Roberto Ameruso për projektin.
Në fakt, Kozenca është një provincë ku ka një numër të konsiderueshëm shqiptarësh; arbëreshët e vendosur aty shekuj më parë e ata që kanë emigruar pas rënies së regjimit komunist.
