Ministri i Jashtëm i Serbisë Ivica Daçiç është shprehur se prania e UNMIK-ut në Kosovë dhe Metohija, me një mandat të pandryshuar si garantues i statusit të neutralitetit të pranisë ndërkombëtare, është me rëndësi të madhe për nxitjen e sigurisë. Ai shton se UNMIK ka rëndësi edhe për stabilitetin e vendit dhe për ndërtimin e besimit mes komuniteteve të Kosovës dhe Metohijës.
Këtë deklaratë e bëri në seancën e Këshillit të Sigurimit të Kombeve të Bashkuara në Nju Jork të martën, kushtuar punës së UNMIK-ut, të botuar nga qeveria serbe. Sipas tij, forcimi i financave dhe kapacitetit të personelit, do t’i mundësojë bashkësisë ndërkombëtare të vlerësojë dhe adresojë në mënyrë gjithpërfshirëse dhe të qëndrueshme, problemet dhe sfidat me të cilar ballafaqohen çdo ditë popujt serbë dhe jo-shqiptar.
“Prania e pakufizuar e UNMIK-ut siguron sigurinë e nevojshme, garanci si dhe shtysë për serbët dhe jo-shqiptarët që të përfshihen në proceset e iniciuara nga marrëveshjet e Brukselit, për të ardhmen e vetes dhe familjeve të tyre. Fakti që sot, 18 vjet pas ardhjes së pranisë ndërkombëtare në provincë, 200 000 persona të zhvendosur brenda vendit, të detyruar të largohen nga Kosova dhe Metohija, vazhdojnë të jetojnë në Serbi jashtë provincës, është një argument i fuqishëm se fushëveprimi i UNMIK-ut nuk duhet të ndryshohet”, tha Daçiç.
Ky i fundit shtoi se në raportin e bërë nga qeveria serbe, janë vërejtur një numër mangësish strukturore të sistemeve institucionale dhe gjyqësore në Kosovë dhe Metohija. “Këto mangësi kanë pasoja negative për komunitetet e prekshme, kryesisht në lidhje me mbrojtjen e të drejtave të serbëve dhe joshqiptarëve të tjerë në jug të krahinës dhe të drejtat e të kthyerve, si dhe procesin e pajtimit mes komuniteteve”, vijoi ai.
Daçiç tha se Serbia vazhdon të jetë e vendosur për dialogun midis Beogradit dhe Prishtinës, të lehtësuar nga Bashkimi Evropian. “Pavarësisht dyshimeve të shumta dhe sfidat e hasura gjatë rrugës, Serbia tregoi vendosmëri të madhe për të gjetur zgjidhje kompromisi, jo gjithmonë të thjeshta dhe të lehta për t’u arritur.
” Fatkeqësisht, përpjekjet e bëra nga Serbia për të gjetur zgjidhje realiste, neutrale ndaj statusit nuk janë pranuar nga pala tjetër, veçanërisht në lidhje me zbatimin e marrëveshjeve të arritura deri më tani. Madje edhe katër vjet e gjysmë pas detyrimit për themelimin e Bashkësisë së Komunave serbe u konsiderua si pjesë kryesore e Marrëveshjes së Parë të parimeve që rregullojnë normalizimin e marrëdhënieve, nuk është shënuar progresi në zbatim. Për ne, krijimi i komunitetit është çështja më e rëndësishme, një gur themeli për mbrojtjen e interesave të serbëve në Kosovë dhe Metohijës”, tha ministri i Jashtëm i Serbisë. /Tirana Today/
