Pasi kishte “pasuruar” gjithë popullin e Myzeqesë me anë të skemave piramidale, Rrapush Xhaferri sjell në Lushnje në vitin 1996 ish-kampionin argjentinas të Kupës së Botës, Mario Kempes, për të drejtuar klubin e futbollit të Lushnjes. Kempes mbërriti me bujë në qytet, pasi kishte nënshkruar një kontratë për 350 mijë dollarë në sezon.
Xhaferri tentoi pa sukses blerjen e nigerianit Okoça. Ndërsa u fol se trajneri kishte premtuar sjelljen në Lushnje të sulmuesit të njohur të kombëtares argjentinase, Gabriel Batistuta. Por ai do të qëndronte në pankinën e Lushnjës vetëm për pak ndeshje, pasi fundi i piramidave do të sillte edhe fundin e ëndrrës së lushnjarëve, për ta parë për herë të parë skuadrën e tyre kampione.
Pas falimentimit të bosit Rrapush Xhaferri, shumë nga lojtarët e huaj përfunduan duke u ushqyer nga familjet lushnjare, pasi nuk kishin asnjë para mënjanë. Vetë Kempes në një intervistë të kohëve të fundit, rrëfeu se u largua me vrap nga Shqipëria, sapo kishin nisur trazirat e ’97-ës.
