Ambasadorja e BE-së, Romana Vlahutin ka deklaruar sot se BE nuk ka asnjë kusht që ka të bëjë me ngritjen e një kampi refugjatësh. Teksa inaguroi zyrën e BE-së në Malësi të Madhe, ajo përcolli një deklaratë e cila sot ka përçarë klasën politike shqiptare. Kjo deklaratë pason pas qëndrimit të Ramës, se në Samitin e BE të zhvilluar një ditë më parë, kanë marrë fund edhe aludimet për ngritjen e një kampi refugjatësh në Shqipëri. Gjatë javës së shkuar, kryeministri është shprehur disa herë për këtë çështje, duke e cilësuar lajmin për ngritjen e kampeve të refugjatëve nga vendet e lindjes së mesme si të rremë.
Duket se liderët evopiane nuk kanë të njëjtën qasje. Është Kancelari austriak, Sebastian Kurz, i cili pohoi se vendet e BE-së po punojnë për një plan për ngritjen e qendrave të pritjes për refugjatët jashtë BE-së.
Kurz pas takimit me Ministrin e Brendshëm gjerman Seehofer, dha pak detaje për këto përpjekje kur u pyet nga mediat.
“Austria po punon me një grup të vogël vendesh të BE-së, për planin e ngritjes së qendrave të pritjes për refugjatët jashtë BE-së. Planet janë tejet konfidenciale për të rritur propabilitetin e realizimit të tyre”.
I pyetur direkt nga gazetarët gjermanë se a është Shqipëria vendi ku do të ngrihet një kamp i tillë, kryeministri i Austrisë dha një përgjigje të shkurtër. “Do ta shohim”, ishte përgjigja e tij.
Një tjetër zyrtar i lartë austriak ka deklaruar në një intervistë për “DW”, se nëse Shqipëria ngre kampet për refugjatët do na ndihmojnë ata.
DW: Shqipëria përmendet si një nga këto vende. A mundet ky vend ta përballojë një barrë të tillë?
Gerald Tatzgern: “Nuk mund t’i përgjigjem kësaj nga këndvështrimi i policisë dhe kriminalistikës, sepse ky është proces politik. Por mund të them nga këndvështrimi i policisë, se nëse do të ngrihen këto qendra, pavarësisht se ku, atëherë ne duhet t’i mbështesim shumë policitë e këtyre vendeve, me qëllim që të mos hapen fusha të reja kriminaliteti, ku vajzat e gratë të shfrytëzohen apo ku trafikantët të zbulojnë fusha të reja veprimi.
DW: A ka plane për këtë?
Gerald Tatzgern: “Ne kemi aktualisht një plan që nga sektori ynë të dërgohen nëpunës (Zyra Federale e Austrisë për Kriminalistikën shën. red.) në Shqipëri. Ne do të zhvillojmë aksione të përbashkëta në kufirin greko-shqiptar, do të shohim për mundësitë e mbështetjes me asistencë teknike, këtë do ta komunikojmë më tej në Bashkimin Europian që kolegët tanë të policisë në Ballkan t’i forcojmë si duhet. Mbështetja jonë do të jetë edhe me personel”.
Donald Tusk: Shqipëria, një nga vendet në diskutim
“Politico. eu” citon deklaratën e Presidentit të Këshillit Europian, Donald Tusk, i cili propozon që krerët e BE-së të krijojnë “platforma rajonale të zbarkimit” jashtë Bashkimit Evropian. Propozimi është një përpjekje për të thyer krizën akute politike mbi migracionin dhe azilin, çështje shume shqetësuese e liderëve te BE që nga viti 2015, që madje ditet e fundit kërcënoi deri të rrëzonte qeverinë gjermane për shkak të përplasjes brenda koalicionit qeverisës.
“Mes vendeve të mundshme partnere janë Tunizia dhe Shqipëria, por zyrtarët thonë se është shumë shpejt që të spekulohet për këtë”, thuhet në artikull.
TIRANA TODAY
