Ministri i Brendshëm, Bledi Çuçi, i shoqëruar nga drejtori i Policisë së Shtetit, Gledis Nano, i ka bërë thirrje bizneseve private dhe bankave që të shpallin 25 majin ditë pushimi, pasi Tirana do jetë e paralizuar nga finalja e Conference League. Çuçi ripërsëriti apelin ndaj qytetarëve që jetojnë jashtë Tiranës, që të mos tentojnë të vijnë në kryeqytet për të parë ndeshjen, nëse nuk kanë një biletë në stadium.
“Do të jemi këtu për të kthyer atë ditë në një ditë të vërtetë feste për gjithë Tiranën. Po parashikojmë çdo gjë në detaje, në mënyrë që të mos cënohet askush në këtë festë të madhe. Çdo gjë është në kontroll. Iu bëj thirrje shqiptarëve jashtë Tiranës, që nuk kanë biletë, mos të tentojnë të vijnë në Tiranë se do jetë në dispozicion të atyre që kanë biletë dhe tifozëve të Romës e Feynoord. Bizneseve që s’kanë lidhje me finalen, restorantet, baret dhe gjithë shërbimet, bankave apo zyrave private, ashtu siç kemi bërë me institucionet publike dhe shkollat, ta shpallin ditë pushimi të mërkurën pasi Tirana do jetë e paralizuar sa i takon qarkullimit të mjeteve. Kemi marrë masa që çdo mik që vjen nga Roterdami dhe Roma t’i ketë dyert e hapura në mënyrë që të aksesojnë Tiranën në mënyrë sa më të lehtë”, tha Çuçi.
Çuçi bëri me dije se dy ekipe policie nga Roterdami dhe Roma i janë bashkuar ekipeve të Policisë së Shtetit, për të bërë të mundur parandalimin e çdo situate të pakëndshme, apo akt dhune mes tifozëve.
“Kemi kohë që punojnë në bashkëpunim me policinë e Roterdamit dhe Romës. Na janë bashkuar ekipet e policisë në mënyrë që të koordinojmë të gjithë veprimet për të parandaluar çdo situatë të pakëndshme. Do marrim masa që të parandalojmë çdo akt dhune që i kemi parë në të gjitha finalet në botë, edhe ndodhin në situata të tilla”, u shpreh ministri.
