Ëndrra e Flamurtarit për merkaton e janarit i kalon pritshmëritë, por gjithçka është e mundur. Përqendrimi i tyre tashmë është vendosur tek mesfushori vlonjat i Beneventos, Ledian Memushajt. Kuqezinjtë janë gati ti ofrojnë një shumë marramendëse për kampionati shqiptarë, për ta tunduar atë që të bashkohet me ta.
Mesfushorin vlonjat, që aktualisht luan në kampionatin italian, Flamurtari e kërkon për 1 vit e gjysmë, pra që të mbyllë këtë sezon dhe të jetë pjesë e ekipit edhe për sezonin tjetër. Administratori Idrizi tha se ka në tavolinë ofertën për ish-kapitenin e Peskarës, duke hyrë në garë me klubet e Serisë A dhe B që kërkojnë mesfushorin. “Dëshira jonë është që në janar të marrim Ledian Memushajn te Flamurtari.”
Administratori Sinan Idrizi duket se nuk bën asnjë hap mbrapa nga ideja e tij “e çmendur”. Ai e kërkon me ngulm Memushajn, ndaj është gati që t’i japë 200 mijë euro për ta tunduar, shumë realisht e konsiderueshme për futbollin tonë. Por, këtë shifër vlonjatët e vënë në dispozicion për një marrëdhënie me afat jo fort të shkurtër.
Ne jemi në garë me dy ekipet e Serisë A dhe B që i kanë dhënë ofertë vlonjatit. Flamurtari ka një ofertë në tavolinë nga ana jonë dhe do t’ia japim së shpejti. Kjo pasi ne duam të marrim lojtarë të vërtetë vlonjatë. Ky ekip nuk ndalet më”, është shprehur Idrizi.
