Një ofertë e “çmendur” ka tronditur Federatën Angleze të Futbollit, pasi ka mbërritur një ofertë prej 800 milionë paund, për të shitur stadiumin mitik “Wembley”. Ofertuesi është Shahid Khan, (Kujdes, jo kryebashkiaku i Londrës, Sadiq Khan), pronar i ekipit të Fulhamit që militon në Championship, divizionin e dytë të kampionatit anglez, e njëkohësisht pronar i ekipit të NFL-së amerikane, Jacksonville Jaguars.
Nga ajo çfarë është raportuar deri tani pagesa do të bëhet në dy aspekte: ku 500 milionë do të paguhen për stadiumin, ndërsa 300 milionë do të ofrohen për Federatën e Futbollit që të mund të mbajë ende obligacionet dhe bizneset mikpritëse në stadiumin legjendar.
“Do të përpiqemi të kujdesemi në mënyrën më të mirë të mundshme për një vend kaq ikonik”, tha Khan në një deklaratë. “Wembley do të rikthehej si pronë private, ndërsa Federata e Futbollit do të mund të fokusohej në misionin bazë të saj të zhvillimit të futbollistëve. Besoj se shumë prej jush, në mos shumica, jeni mbështetës të Kombëtares së Anglisë, kështu që shpresoj ta konsideroni këtë mundësi potenciale për t’u bërë realitet”.
Shitja e mitikut “Wembley” do t’i lejonte Federatës së Futbollit të investonte fuqishëm në futbollin e moshave shumë të reja. Çështja gjithsesi është diskutuar në një takim të bordit të Federatës së Futbollit gjatë kësaj të enjteje. Nuk dihet nëse do të mbetet ende në kuadrin e një oferte, apo do të bëhet realitet. Por, stadiumi prej 90 mijë vendesh, më i madhi në Mbretërinë e Bashkuara, ka kushtuar plot 757 milionë paund për t’u ndërtuar dhe është hapur në vitin 2007. Në janar, Federata njoftoi se do të përfundonte pagesat për tokën ku është ngritur stadiumin në fund të vitit 2024.
