E ftuar mbrëmjen e djeshme, në studion e “Opinion” të gazetarit Blendi Fevziu, kryetarja e Lëvizjes Socialiste për Integrim, ishte protagonistja e emisionit përballë një paneli gazetarësh të njohur, ku ajo foli për disa çështje kyçe që lidhen si me partinë politike që ajo drejton, po kaq edhe me rolin e opozitës, strategjitë e radhës, etj.
Por, ajo që ra në sy tek të gjithë, ishte pikërisht eleganca e pashoq, një tipar ky i dukshëm në çdo detaj të pamjes së saj. Monika Kryemadhi dukej në super formë fizike dhe një zonjë mjaft e kuruar, që i mahniti të gjithë. Sa i takon veshjes ajo nuk kishte gabuar në asnjë moment në zgjedhjen e saj. Kostumi i kuq, dhe këmisha në nuancë pastel me fruda në pjesën e parme, ishte gjetje shumë e veçantë nga ana e saj. Ndërkohë që edhe në portret ajo shkëlqente sakaq, shkruan Class.
Me një grim me tonalitet neutral, me frizurën e veçantë dhe tiparet e qarta, Monika na konfirmoi edhe njëherë se është në një top formë totale. Edhe pse një politikane me axhendë të ngjeshur aktivitetesh ditore, mama e tri fëmijëve dhe bashkëshorte e Presidentit të Republikës së Shqipërisë, me sa duket asgjë nuk e zmbraps në dëshirën për t’u dukur elegante dhe e kuruar në tërësi. Edhe pse vitet ikin, deputetja e Kuvendit të Shqipërisë na vërteton më së miri se ato mbeten thjesht numra…
