Presidenti Ilir Meta ka folur sot për herë të parë lidhur me çështjen e Prokurorit të ri të Përgjithshëm, teksa kjo çështje është një nga më të diskutuarat dhe që ka krijuar debat mes mazhorancës dhe opozitës.
Teksa u pyet nga gazetarët në një konferencë të përbashkët me presidentin malazez, Meta tha se zgjedhja e Prokurorit të Përgjithshëm është përgjegjësi e Kuvendit duke kërkuar respektimin e Kushtetutës, ndërsa vuri theksin te rëndësia e dialogut mes palëve.
Sipas tij, një zgjidhje e njëanshme nuk do të kontribuonte për vendin.
Debati aktual në Shqipëri është çështja e Prokurorit të Përgjithshëm. Cili është qëndrimi i Presidentit Meta lidhur me Kryeprokurorin e përkohshëm pasi nuk jeni shprehur deri më tani?
Sikurse ju e dini kjo është një përgjegjësi ekskluzive e Kuvendit të Shqipërisë. Si president unë dua të nënvizoj, derisa kemi të bëjmë me një çështje të rëndësishme të një institucioni kyç të drejtësisë, që duhet respektuar Kushtetuta dhe fryma e saj. Është e rëndësishme që të ketë midis aktorëve kryesorë një dialog të shpejtë, të përgjegjshëm dhe të bazuar mbi standarde transparente për zgjidhjen e kësaj çështjeje, pasi çdo hap i njëanshëm nuk do t’i ndihmonte konsolidimit të pavarësisë së institucioneve dhe rritjes së besimit të institucionet e reja të drejtësisë.
