Manchester City nën drejtimin e Guardiolës dështoi sërish për të arritur një sukses në Champions League, pasi u eliminua nga Tottenham edhe pse fitoi 4-3. Që prej largimit nga Barcelona, Championsi është bërë “mollë e ndaluar” për trajnerin Pep Guardiola.
Në përfundim të takimit, trajneri spanjoll pranoi verdiktin e fushës, por theksoi se ka dyshime për golin e Llorentes, që rezultoi vendimtar për fatin e kualifikimit.
“Është mizore, por duhet ta pranojmë. Pas 20 minutash, kryesonim 3-2 dhe në pjesën e dytë krijuam shumë raste, duke shënuar golat që na duheshin. Për fat të keq shkoi keq për ne dhe nuk na mbetet veçse t’i urojmë fat Tottenhamit për gjysmëfinalet. Jam pro VAR-it, por te goli i Llorentes, kam përshtypjen se kishte një prekje me dorë”, tha Guardiola.
Raheem Sterling shënoi golin e kualifikimit për City-n në minutat shtesë, pro VAR-i ndërhyri për ta anuluar për pozicion jashtë loje, ndërsa Guardiola u pyet edhe për këtë moment.
“E pashë aksionin dhe njerëzit më konfirmuan se ishte në pozicion jashtë loje. Ne humbëm edhe një penallti në ndeshjen e parë, por jam shumë krenar për futbollistët dhe tifozët. Kurrë nuk kam parë mbështetje të tillë, që kur kam ardhur në Manchester, por futbolli është i paparashikueshëm”, tha trajneri spanjoll.
