Netët e mëdha evropiane janë një element kryesor i folklorit në Anfield. Konkurrenca kontinentale ka qenë gjithnjë në qendër të vëmendjes të tifozëve të kuq të Liverpulit.
Besimi është formuar që gjithçka është e mundur kur stadiumi dhe ekipi ushqejnë njëri-tjetrin. Atmosfera bën që edhe më të fuqishmit të dridhen.
Pa fansat Liverpuli nuk është më i fuqishëm se Reali i Madridit, i cili mbrëmjen e sotme shkon në Merseyside për të mbrojtur epërsinë 3-1 në këtë ndeshje kthimi të çerekfinaleve të Ligës së Kampionëve. Dhe para fillimit ka një ndjenjë keqardhjeje për ndeshjen e sotme: ah sikur të ishte me tifozë, detyra do të ishte shumë më e lehtë!
Superioriteti i Realit javën e kaluar në kryeqytetin spanjoll ishte aq i theksuar sa është e vështirë të mendohet një mënyrë se si skuadra e Jurgen Klopit mund të kthejë rezultatin në favor. Prania e tifozerisë së plotë të zjarrtë e ka kthyer rezultatin përmbys në shumë raste. Pa tifozë, Liverpuli është gjysma e ekipit.
Pjesa më e madhe e rrëfenjave që thuhen në bisedat e tifozëve në Liverpul janë rreth ndeshjve evropiane në Anfield: fitorja 4-0 ndaj Barcelonës dy vjet më parë; humbja 3-0 e Mançester Sitit 12 muaj më parë; rikthimi 4-3 kundër Borusia Dortmundit në 2016-ën. Këta janë vetëm shembujt e viteve të fundit. Legjendat datojnë që nga antikiteti ama: Çelsi në 2005-ën, St Etienne në 1977-ën, Interi në 1965-ën etj.
Kapiteni i Realit Sergio Ramos u testua sërish pozitiv për koronavirusin para ndeshjes së sotme në Champions kundër Liverpulit.
“Nëse ka ndonjë gjë që më dhemb, është të mos jem në gjendje të ndihmoj ekipin në këto ndeshje vendimtare.“- tha Ramos
