E tija është një histori e pabesueshme, plot dështime, sakrifica … arritje
Në moshën 14 vjeçare, Le Havre e refuzoi vetëm pas një viti: kështu ai filloi të endet mes ekipeve të të rinjve të klubeve të ndryshme amatore.
Në moshën 19 vjeçare, e federon Cherbourg për portier të dytë, një klub që noton midis serisë së tretë dhe të katërt franceze. Dy sezonet e para bën rezervën, të tretin arriti të fitonte me punë pozicionin e titullarit. Por është vetëm një iluzion. Është viti 2014, Mendy është 22 vjeç dhe klubi vendos të mos t’ia rinovojë kontratën duke e lënë mes katër rruëve.
Kështu ai i beson një menaxheri i cili i premton atij League One, kategoria e tretë e Anglisë, por me të mbërritur atje ai e kupton mashtrimin.
Bota duket se bie mbi të, për një moment e përkëdhel ideja e heqjes dorë nga gjithçka.
Koha kalon dhe ofertat nuk vijnë, Eduardi vendos të regjistrohet në zyrat e punës: do të kishte pranuar të bënte çdo punë në mënyrë që t’i jepte qetësi partneres së tij shtatzënë. Për një vit të tërë ai vazhdon me punë të vogla këtu atje, ndërkohë që vazhdon të stërvitet i vetëm. “Unë nuk e dija se si do të shkonte, kisha frikë, por doja që djali im ta dinte që babai i tij, në momentin e një vështirësie të madhe, nuk u dorëzua”, do të deklaronte më vonë ai për RMC Sport.
Dhe, për fat të mirë, vendosmëria e tij u shpërblye.
Pas një viti pa ekip, një shok i vjetër dëgjoi historinë e tij dhe vendosi të kontaktojë menaxherin e portierëve të Marsejës. Ndodh kështu që OM-së i mungon një portier për ekipin rezervë. Një dritë e vogël mund të shihet në fund të tunelit. Por edhe atje, pas dy sezonesh dhe disa paraqitjesh, ai u hodh poshtë.
Por tani ama, ka më shumë mundësi merkatoje dhe Reimsi, atëherë një klub i divizionit të dytë, vendos të nënshkruajë me të si rezervë.
Dhe ky është momenti kur historia e tij ndryshon përgjithmonë.
Amiens – Reims, java e parë. Portieri titullar bën një dalje të gabuar dhe rrëzon një kundërshtar: karton i kuq. Ja ku vjen mundësia. Varet nga ai që të provojë se mund t’ia dalë. Dhe i’a del më së miri.
Në atë ndeshje ai pret gjithçka që i vjen kundër, luan ndeshje të tjera të mira, duke fituar kështu vendin e titullarit në sezonin vijues, atë të fitores së kampionatit dhe kthimin në Ligue 1 të klubit.
Në 2019-ën transferimi në Rennes, ku ai e pozicionon veten si një nga portierët më të mirë në kampionat dhe gjithashtu e bën veten të njohur ndërkombëtarisht.
Verën e kaluar telefonata nga Çelsi, i cili pagoi 25 milion për të.
Më 29 maj, ora 21:00 luhet finalja e madhe e Championsit të këtij sezoni, Mançester Siti – Çelsi, nuk do të jetë e lehtë, por për Edouard Mendin asnjëherë nuk ka qenë e lehtë. /t.k/
