Në “I Ftuari” me Endri Xhafon në “A2”, Fatmir Mediu hodhi hipoteza të ndryshme lidhur me vetëdorëzimin e Klement Balilit. Ai deklaroi se pas dorëzimit të tij fshihen interesa politike, dhe se nuk ka ardhur kurrsesi për shkak të interesave europiane dhe amerikane.
“Çfarë marrëveshje fshihet pas dorëzimit? Kur arrihet një marrëveshje me Ramën, është për interesat e Ramës, edhe në raport me opinionin ndërkombëtar, por edhe me raporte të brendshme. Nuk mendoj që dorëzimi erdhi për shkak të interesave europiane dhe amerikane të shqiptarëve. Mendoj që janë interesa të tjera”, tha Mediu.
“Megjithatë mbetet për t’u parë. I pari që deklaroi dorëzimin e Balilit është ish-kryeministri Berisha. Më pas qeveria tha se ishte arrestim. Nëse nga pikëpamja procedurale është rënë dakord të dorëzohet, nuk mendoj që quhet arrestim”, shtoi ai.
