Ish-kryeministri i Maqedonisë, Nikolla Gruevski pritet që të vizitojë Brukselin, ku do të takohet me zyrtarët e lartë të Bashkimit Evropian. Ai është shoqëruar nga ish-ministri i Jashtëm, Nikolla Poposki dhe nga disa anëtarë të partisë së tij.
Gruevski pritet të takohet me përfaqësuesen e lartë të BE-së për Zgjerim, Federika Mogerini, me kryetarin e Këshillit Evropian, Donald Tusk dhe zyrtarë të tjerë të lartë evropianë.
Kjo vizitë realizohet pas takimit të djeshëm që Gruevski pati me ambasadorin e Bashkimit Evropian në Shkup, Samuel Zhbogar, ku është vërejtur se e ka zbutur retorikën në raport me BE-në.
Reagimi i Gruevskit erdhi pas lajmit se javën që vjen në Maqedoni do të vijë komisari për zgjerim dhe fqinjësi, Johannes Hahn dhe Reinhard Priebe, kryesuesi i grupit të ekspertëve të BE-së të cilët vitin e kaluar përpiluan listën e reformave prioritare që duhet t’i zbatojë Maqedonia.
Hahn dhe Pribe do të takohen me të gjithë faktorët politikë në Maqedoni me të cilët do të diskutohet orientimi i vendit për tu anëtarësuar në BE dhe NATO.
Akoma nuk dihen arsyet e vizitës së Gruevskit në Bruksel, por gjithsecili e kupton që ai nuk i sheh me sy te mirë reformat dhe anëtarësimin e Maqedonisë në BE dhe NATO, pavarësisht retorikës së tij në publik.
