Kryeministri Edi Rama njihet si një personalitetet më karizmatikë e si i tillë nuk kishte si të linte mënjanë batutat e tij, si gjithnjë të gatshme në çdo rast.
Ai ka shkaktuar të qeshura sot teksa foli në selinë e Bankës Evropiane për Rindërtim dhe Zhvillim, në panelin e kryeministrave të Ballkanit Perëndimor.
Gjatë fjalës së tij, Rama ka promovuar turizmin shqiptar, ndërsa duket se nuk kanë munguar as të qeshurat në sallë, si një habi mbi ato që po thoshte kryeministri.
“Duket sikur po bëjmë fushatë. Do të thoja që i provuat të gjithë ata, tani provoni Shqipërinë. Të gjithë e dinë, ma ha mendja se ne kemi mjaft potencial në sektorin energjetik. Javën e kaluar kemi nënshkruar një kontratë me SHELL-in për eksplorim në bregdet, që është një kontratë e madhe. Kemi optimizëm të arsyeshëm se ka burime të reja të mëdha të gazit të naftës në Shqipëri. Do të doja të theksoja turizmin si fokusin kryesor, së paku për 10 vitet në vijim, sepse ka një kërkesë jashtë mase të madhe dhe që po rritet shumë. Operatorët tanë turistik janë të detyruar të kthejnë mbrapsht 25% të kërkesës për shkak të mungesës së infrastrukturës sonë pritëse, edhe pse shifrat janë rritur në mënyrë të ndjeshme vit pas viti. Edhe një herë, kushdo që vjen po kërkojnë të vijnë e të shqyrtojnë mundësi eksplorimi, janë të mirëpritur. Jo vetëm do të fitojnë një pasuri të tërë…
Çfarë arsye ka për të qeshur?…”, ndërpret papritur fjalën e tij Rama, fjalimi i të cilit duket se ka shkaktuar humor në sallë.
Më pas vijon:
“Ahh, nuk e prisja këtë të qeshur optimizmi… Në fakt, ka gjithnjë një arsye për të ardhur në Ballkan sepse nuk është asnjëherë i mërzitshëm. Është një arsye e mirë sepse fitimi është i rëndësishëm. Po të shijosh jetën, është shumë me rëndësi. Po shoh gjithnjë e më tepër investues të depresionuar në Londër, kështu që mendoj se Ballkani është një destinacion shumë i rëndësishëm për ta provuar e për të ngritur moralin”, ironizon kryeministri.
Më pas ndërhyn moderatori, i cili e komplimenton Ramën për provokimin, teksa thotë:
Kjo më pëlqen te ju zoti Rama se jeni provokativ.
Rama: Më duhet t’ju korrigjoj, është e vërteta provokative. Duke qenë gjithë kohën në ujë e duke mos thënë të vërtetën …kjo është shumë e mërzitshme!
