Kategoria Superiore, por edhe i gjithë futbolli shqiptarë në tërësi është i një niveli mjaft të ulët, ku mund të përjashtohet vetëm dy tre ekipe. Përpos infrastrukturës minimale që mungon në disa qytete dhe mungesës së profesionistëve që mund të rrisin nivelin e futbollit shqiptarë, rrezik konkret po kthehen edhe arbitrat. Janë shtuar rastet së fundmi në Superiore ku janë akuzuar arbitra për njëanshmëri dhe vendime që kanë dëmtuar ekipet në fushën e lojës. Sepse në Kategorinë e Parë, të Dytë dhe me radhë këto thirrje nuk kanë munguar ndër vite.
Flamurtari është ekipi që po ngre zërin fuqishëm dhe ka paralajmëruar një protestë ndaj FSHF-s këtë javë, për shkak se gjyqtarët që kanë shoqëruar vlonjatet në këto javë kanë qenë të njëanshëm dhe u kanë prishur mjaft punë në rezultate. Por ka edhe ankesa të tjera të lehta të themi sa i përket arbitrimit nga ekipet që janë ngjitur këtë vit në Superligë, pasi pretendojnë se shikohen nga arbitrat me një sy tjetër. Drejtuesit e Flamurtarit kanë dhënë edhe një listë me fakte e video ku arbitrat në të njëjtat situata kanë marrë vendime të ndryshme për ta dhe kundërshtarët. Janë bërë thirrje FSHF-s për të rishikuar çështjen e gjyqtarëve të ndeshjes por nuk është marrë asnjë masë deri më tani. Kjo sjell edhe një agravim të situatës, sa ekipi dhe tifozët vlonjate të dalin hapur në protestë në ndeshjen e radhës. Sa u përket fakteve që janë depozituar nga klubi i Flamurtarit, ato janë komentuar nga gjyqtari i pezulluar Jemini, i cili i ka vlerësuar si të drejta këto vendime. Tani, e bëri se ishte në të vërtetë ashtu, apo për të shpresuar në një rikthim në fushën e lojës për të arbitruar kjo nuk dihet. Pasi Jemini ka deklaruar se nuk ka bërë asnjë gabim në arbitrim dhe se nuk ka ndonjë akuzë mbi të. Ky i fundit ishte i zgjedhur edhe nga UEFA për të arbitruar.
Bomba më e madhe sa i përket arbitrimit në fushën e lojës ka ardhur nga ekipi i Mamurrasit i kategorisë së Dytë. Ku presidenti dhe bordi drejtues kanë vendosur të shkrijnë ekipin dhe këtë përgjegjësi e kanë arbitrat sipas tyre. Mamurrasi është ndjerë i dhunuar nga arbitrat në shumë raste dhe shpeshherë kanë ngritur zërin. Si duket situata kishte degraduar në një pikë që drejtuesit nuk kishin besim se në Shqipëri do të luhej futboll dhe do ta shijonin si duhet saqë vendosën ta shkrijnë ekipin. Po vërtetë kaq rëndë është situata në futbollin shqiptarë? Ndoshta është më keq se ç’duket, ndoshta disa e bëjnë për tu shfajësuar për disfatat në fushën e lojës.
FSHF është institucioni më i lartë i futbollit dhe që merret me organizimin e çdo detaji, në çdo kategori. Ne jemi mësuar të shohim vetë Superioren dhe të mjaftohemi me aq, me dy apo tre skuadra që dominojnë çdo vit pasi kanë financa të mira. Por nëse do të zbrisnim në çdo qytet që luhet futboll, do ta shikojmë nga afër se në çfarë gjendje është futbolli shqiptarë.
Duhet të pyesim veten pse nuk kemi asnjë futbollist në Kombëtaren e madhe, që të jetë aktiv në futbollin Shqiptarë? Përgjigja është e thjesht, shko një javë shiko stërvitjen, kushtet dhe profesionalizmin që ushtrojnë këta djem dhe atëherë e ke përgjigjen brenda. Futbolli në Shqipëri nuk është ekipi i Skënderbeut që po shkëlqen në Europë, nuk është meritë e institucioneve të futbollit Shqiptarë kjo arritje, por e vetë presidentit përkatës. Edhe Kombëtarja shqiptare ka bërë paraqitje mjaft të mira në arenë evropiane, por sa e pasqyron ajo futbollin shqiptarë. Përgjigja është e thjeshtë dhe e qartë që, aspak. Kjo pasi nuk kemi parë asnjë futbollist që luan në kampionatin Shqiptarë, por gjithmonë janë preferuar lojtarë që vijnë nga kampionate të huaja. Kjo është një tregues i qartë se çfarë niveli ka Superliga shqiptare. (Tirana Today)
