Gjykata e Tiranës ka dhënë 11 vite burg për Kastriot Ismailajn i akuzuari kryesor në çështjen CEZ-DIA. Gjykata gjithashtu vendosi për sekuestrimin e 4 milion dollarëve pasuri. Ismailaj akuzohet për mashtrim “Mashtrim me pasoja të rënda” dhe “Pastrim të parave” në mbledhjen e borxheve të CEZ, vepra këto të kryera në bashkëpunim me persona të tjerë. Prokuroria e Tiranës kërkoi 15 vite burg për Kastriot Ismailajn.
Sipas organit të akuzës, Ismailaj me anë të falsifikimit e mashtrimit ka arritur të përvetësojë nga kompania CEZ-shpërndarje rreth 5 milonë euro. Dje në seancën ish-administrator i DIA, Isamilaj tha “Kam 100 prova të reja, të cilat nuk u shqyrtuan. Dua që të merren në konsideratë.”
Historia e Dosjes CEZ-DIA
Kompania DIA e Kastriot Ismailajt dhe CEZ Shpërndarje lidhën një marrëveshje me 1 shtator 2010 për mbledhjen e borxhit të trashëguar nga operatori i shpërndarjes së energjisë, që sipas një investigimi të mëparshëm të BIRN arrinte në shumën e 230 milionë eurove.
Marrëveshja sipas Prokurorisë është firmosur nga Ismailaj, Hejsek dhe Ivan. Prokuroria e Tiranës sqaron se kontrata e parë nuk u miratua nga Këshilli Mbikëqyrës i CEZ Shpërndarje dhe për këtë arsye, më datë 1 shkurt 2011, midis palëve u nënshkrua një marrëveshje e dytë me të njëjtin objekt për një afat 2-vjeçar.
“Nga tërësia e të dhënave të administruara gjatë hetimit të këtij procedimi penal arrihet në konkluzionin se qëllimi i vetëm i të pandehurit nuk ka qenë mbledhja e borxhit të kompanisë dhe as kryerja e ndonjë pune reale, por vjedhja e shoqërisë CEZ Shpërndarje sh.a,” thotë Prokuroria e Tiranës.
“Të pandehurit…krijuan një mekanizëm të tërë fiktiv që konsistonte në zvogëlimin e pasurisë së shoqërisë CEZ Shpërndarje, me qëllim kalimin e këtyre parave tek shoqëria DIA,” shton Prokuroria.
Pavarësisht manovrave që i sollën 4.5 milionë euro fitime, Kastriot Ismailaj iu drejtua gjykatës së arbitrazhit në Vjenë pas prishjes së kontratës, duke kërkuar 130 milionë euro nga OSSHE.
Dokumentet për llogari të këtij procesi në arbitrazh, të publikuara nga BIRN në investigime të mëparshme tregojnë se “përfitues të parave që DIA mori nga CEZ Shpërndarje ishin politikanë të rëndësishëm shqiptarë, përfshirë një ish-kryeministër të proceduar për korrupsion”.
Sipas një dëshmie që Hejsek dha për avokatët e palës shqiptare në arbitrazh, Ismailaj u trajtua si “kandidati” i qeverisë shqiptare për mbledhjen e borxheve të vjetra, pasi u prezantua si aleati i ngushtë i Metës dhe i ish-kryeministrit Berisha nga ambasadori shqiptar i asaj kohe në Pragë, Qazim Tepshi.
