Ramazani vjen si pranverë në jetën e besimtarëve, dhe u fal atyre një gjallëri dhe forcë shpirtërore. Këtë vit, data 27 prill 2022 shënon një moment të veçantë për besimtarët myslimanë, pasi është Nata e Kadrit, e cilësuar si më e vlefshme se 1000 muaj.
Vlen të theksohet fakti se sipas literaturës dhe dijetarëve myslimanë, data e saktë nuk dihet, por ka disa rrugë për ta kërkuar atë. Nata e Kadrit ndodhet në 10 ditëshin e fundit të muajit Ramazan dhe në netët teke, pra nata 21, 23, 25, 27 dhe 29 janë që të gjitha aleternativa të mundshme se kur mund të jetë kjo natë e shënuar për myslimanët.
Sipas dijetarëve të Islamit, kjo natë është lënë e papërcaktuar saktësisht, me qëllim që besimtarët të shtojnë adhurimet në 10 ditëshin e fundit, dhe të mos mjaftohen vetëm me një natë. Qëllimi këtu është që besimtarët të bëhen më të devotshëm. Gjithashtu ka disa shenja për të dalluar këtë natë të veçantë. Nata e Kadrit shërben si katalizator për të ngritur shkallën e mirësisë të mbarë shoqërisë besimtare në pikën më të skajshme.
Pyetja më e shpeshtë gjatë dhjetëditëshit të fundit të Ramazanit është: Kur është Nata e Kadrit? Kur duhet të agjëroj për Natën e Kadrit?
Kjo pyetje bëhet pasi ka shumë nga ata që nuk agjërojnë gjatë gjithë Ramazanit, por zgjedhin të agjërojnë vetëm për Natën e Kadrit. Madje, ka edhe jo myslimanë të cilët e mbajnë këtë agjërim me sinqeritet të madh.
Përse është e fshehur Nata e Kadrit?
Përse ajo është mbajtur e fshehur nga besimtarët, dhe përse ata janë porositur ta kërkojnë atë në dhjetëditëshin e fundit të Ramazanit?
Sepse, duke mos e përcaktuar atë, Zoti me anë të mëshirës së Tij, kërkon që besimtarët të tregojnë qëndrueshmëri në adhurimet, lutjet dhe sakrificat e tyre, dhe të shtojnë përpjekjet për të fituar mirësinë dhe shpërblimin prej Tij. Në këtë mënyrë, Zoti dallon robërit e Tij të sinqertë të cilët garojnë me njëri-tjetrin për vepra të mira, prej atyre që ndjekin verbërisht disa tradita dhe u binden interesave të tyre. Nëse të gjithë do të dinin, me përpikmëri se kur do të binte Nata e Kadrit, ata nuk do të prisnin Ramazanin me të njëjtin entuziasëm e gatishmëri.
A lejohet të agjërosh vetëm për “Natën e Kadrit” dhe jo për gjithë muajin e Ramazanit?
Agjërimi gjatë Ramazanit gjithmonë është i mirë se sa mos agjërimi, në kushtet kur njeriu gëzon shëndet dhe nuk është udhëtar. Një ditë agjërimi nuk mund të jetë zëvendësim i gjithë muajit të Ramazanit. Ndaj, besimtarët duhet të përpiqen të agjërojnë më shumë ditë, duke e çuar pak nga pak 30 ose 29 ditë numrin e ditëve të agjërimit.
