Në Republikën Demokratike të Kongos po mbahet një ceremoni, për të varrosur dhëmbin e heroit të pavarësisë Patrice Lumumba, me kurorë ari, më shumë se 60 vjet pasi u vra.
Është e vetmja pjesë e trupit të tij që ekziston pasi mbetjet e tij janë tretur në acid. Polici belg që mbikëqyri asgjësimin, e mori dhëmbin si trofe.
Ajo iu kthye familjes javën e kaluar dhe ka vizituar disa pjesë të DR Kongos në një arkivol. Njerëzit kanë mundur të bëjnë nderimet e tyre përpara funeralit që po zhvillohet në kryeqytetin, Kinshasa.
Presidenti Félix Tshisekedi, familja e Lumumba dhe personalitete të tjera janë në shërbimin që po bëhet përpara se arkivoli të transferohet në një mauzoleum të ndërtuar posaçërisht.
Lumumba ishte kryeministri i parë i vendit dhe një nga udhëheqësit e luftës për pavarësi. Ai u pa gjithashtu si një nga zërat më të spikatur në lëvizjen antikoloniale të Afrikës.
E enjtja shënon 62 vjet që kur ish-fuqia koloniale Belgjika hoqi dorë nga kontrolli i vendit të gjerë. Në një fjalim të famshëm në ditën e pavarësisë në vitin 1960, përpara personaliteteve belgë, përfshirë mbretin Baudouin, Lumumba kritikoi Belgjikën duke thënë se kongolezët ishin mbajtur në “skllavëri poshtëruese”.
Belgët mbetën të shtangur pasi një afrikan i zi nuk kishte guxuar kurrë të fliste kështu para evropianëve. Lumumba u rrëzua si kryeministër pak më shumë se dy muaj më vonë. Më pas, në janar 1961, me mbështetjen e heshtur të Belgjikës, ai u qëllua nga një skuadër pushkatimi, së bashku me dy aleatë.
Një polic belg, Gerard Soete, iu dha detyra për të hequr qafe provat. Pikërisht gjatë atij procesi ai futi dhëmbin në xhep dhe e mori me vete në Belgjikë. Dekada më vonë ai zbuloi se e kishte ende dhëmbin dhe vetëm dy vjet më parë Belgjika ra dakord që ai t’i kthehej familjes. Pandemia e Covid-it e vonoi procesin, por javën e kaluar u dorëzua në Bruksel.
Burimi i lajmit: BBC. Përshtatur nga Tirana Today
