Mbrëmjen e së mërkurës ata shkatërruan Bayern Munich, që rezultoi fatale për Carlo Ancelottin, por si duket është vetëm një marrëveshje që nuk do zgjasë shumë. Cavani e Neymar të dy i kanë hedhur poshtë zërat për mosmarrëveshje, por me ngjarjet e fundit duket se këta dy lojtarënuk mund të bashkëjetojnë në të njëjtin ambient dhe se njëri duhet të largohet.
Të dy shënuan, ashtu si dhe Dani Alves, miku i ngushtë i Neymar. Pas ndeshjes, sipas mënyrës së tyre, provuan të qetësojnë shpirtrat, sepse para së gjithash është skuadra. “Kam lexuar shumë histori, – tha Neymar për mediet braziliane. – Flasin për gjëra që nuk i dinë dhe që nuk ekzistojnë”. I pyetur për raportin me Cavani, braziliani u shpreh: “U përgjigja”. Më pas elozhe për Mbappé: “Privilegj të luash me të, duket si një 30-vjeçar nga pjekuria. Në të ardhmen e pret topi i artë”.
Cavani ka lënë mënjanë çështjet personale. Një goditje dënimi e gjuajti ai dhe një tjetër Neymar. “Kemi diferenca, – është shprehur uruguaiani. – Secili ka mënyrën e tij të të menduarit dhe të të jetuarit, por në fushë duhet të jemi një familje. Kjo ka rëndësi”, shkruan vipsport.
“El Pais” më parë tregonte për një ofertë prej 1 milion eurosh nga PSG për “Matador”, që t’i linte penalltitë Neymar. Por, pavarësisht rinovimit, raportet mes Cavani dhe klubit nuk janë si dikur. Vështirë të largohet në janar, por në fund të sezonit është e mundur. E duan shumë skuadra, në Spanjë, Itali dhe Bayern Mynih.
