Carabao Cup/City “shkel” Arsenalin dhe rrëmben trofeun e parë sezonal

Manchester City edhe njëherë ka vërtetuar se është në një nivel tjetër nga ekipet e Premier League, duke mposhtur Arsenal me rezultatin e thellë 3-0. Me këtë fitore “qytetarët” e drejtuar nga Guardiola sigurojnë edhe trofeun e parë sezonal që është Carabao Cup.

Një ndeshje që priteshe të dhuronte spektakël, por që në fakt ka qenë një nënshtrim i skuadrës së Wenger, e cila nuk arriti të dominojë në asnjë fraksion të lojës. Shansi i parë për shënim ishte nga “Topçinjtë” dhe si duket u mjaftuan me aq. Një gabim i Mustafit bëri që Aguero të shënonte një supergol dhe më pas gjithçka ishte më e lehtë për Cityzen.

Por golat e tjerë erdhën pas pushimit, ndërsa Arsenal asnjëherë nuk u mundua të rikthehej në lojë. Kapiteni Kompany shënoi golin e dytë dhe ai që vulosi përfundimisht rezultatin ishte David Silva, tashmë i rikthyer në formacionin e Guardiola-s. Një lajm tjetër i mirë për City-n është rikthimi i Gabriel Jesus, i cili u fut në fushë në fund të takimit.