Është qëlluar apo jo nga afër viktima Konstandinos Kacifas? Kjo është dilema dhe akuza e familjarëve, e cila do të zbardhet me ngritjen e ekspertizës së thelluar, ku marrin pjesë 4 ekspertë të Institutit të Mjekësisë Ligjore.
Këta të fundit do të përcaktojnë mënyrën dhe rrethanat e vdekjes së ekstremistit grek, që u qëllua të dielën nga RENEA.
Ky konkluzion do t’i bashkangjitet kartelës së vdekjes, por edhe fashikullit hetimor të Krimeve të Rënda. Familjarët kanë hedhur akuza se forcat speciale RENEA mund ta kishin kapur të gjallë minoritarin grek, ndërsa tashmë reparti RENEA i ka dorëzuar prokurorisë të gjithë procedurën se si u zhvillua aksioni.
Në raport-shërbim thuhet se Kacifa ka qëlluar me armën automatik përgjatë dy orëve operacion, duke rrezikuar jetën e oficerëve dhe gjatë shkëmbimit me armë zjarri ai është qëlluar nga policia nga një distancë e konsiderueshme.
Në grupin e mjekëve ligjorë shqiptarë nuk ka asnjë ekspert të huaj, jo vetëm sepse nuk ka një kërkesë të tillë zyrtare pranë organeve të hetimit, por edhe sepse ligji nuk e lejon diçka të tillë.
Grupi i ekspertëve parashikon ta përfundojë procesin brenda 10 ditëve. Së fundmi, kunati i Kaçifas i cili ka parë trupin e viktimës në morg, tha se ky i fundit është qëlluar në një distancë shumë të afërt pikërisht kur po u dorëzohej forcave speciale.
