Një ngjarje e habitshme ka ndodhur në Francë, ku një gropë 5 metra e thellë dhe 10 metra e gjerë është hapur krejt papritur në qendër të Amiensit.
Sipas mediave franceze, ngjarja dyshohet të ketë ndodhur gjatë orëve të natës teksa besohet se shkak të ketë qenë kolapsi i një qilari mesjetar.
Ishin patrullat e policisë bashkiake ato që e vunë re këtë fenomen, ndërsa banorët e shtëpive dhe bizneseve përreth u evakuan.
Në qytetin francez, shumë banesa të hershme, janë të pajisura me qilarë, e madje nën qytet ka edhe shumë rrënoja galo-romake. Tani, teknikët do të marrin në dorë situatën dhe do të përcaktojnë se çfarë duhet bërë.
Nga ana tjetër, zyrtarët lokalë u shprehën të lehtësuar që nuk ka pasur të lënduar, pasi nëse incidenti do të kish ndodhur në një orë tjetër të ditës, dhe jo në mes të gushtit, bilanci mund të kish qenë ndryshe.
