Deputeti socialist Ervin Bushati, zbuloi se ka marrë një numër të madh kërcënimesh, pas njoftimit të mbylljes së lojërave të fatit. I ftuar në “Natë me Xhaxhiun”, ai ka komentuar ligjin për “lojërat e fatit”, i cili sot do të kalojë në Kuvend.
“Kemi marrë shumë mesazhe. Edhe kur kemi kaluar Reformën në Drejtësi, nuk kemi marrë një sulm të tillë të organizuar. Kemi pasur mesazhe edhe nga ata që janë në punë të ndershme. Apo edhe ata që janë të papunë. Kishim nga ata që punojnë dhe e lënë rrogën aty”, theksoi ai.
Bushati tha ndër të tjera se ka qenë një ndër deputetët që ka kundërshtuar kalimin e këtij ligji, për faktin që grupet e interesit nuk ishin njoftuar më herët. Ai shtoi se shoqëria shqiptare mbetet e brishtë për t’u marrë me bizhozin.
“Mendoj se do të hyjë në historinë e mazhorancës, si një nga reformat për t’u mbajtur mend. Industria e basteve ka marrë përmasa të frikshme. Llogarisin të njëjtin efekt në tru me atë të drograve të rënda.
Ne kemi pasur taksa të ulëta, dhe nuk kemi patur mundësinë për ta trajtuar si industri më vete. Kur vëjmë në peshore shqiptarët dhe 7 firmat, mendojmë për interesin publik. Shoqëria shqiptare është shumë e brishtë për t’u marrë me bizhozin.
Në rradhë të parë, ne nuk themi që do ta zgjidhim 100 %. Prap do të kenë mundësinë të luajnë. Do jetë llotaria kombëtare, e cila ka konçension, është telebingo që do vazhdojë. Unë jam marrë më këtë, dhe kam qenë nga deputetët që kam kërkuar shtyrjen e ligjit. Janë grupe interesi të fuqishme që kanë ndikim në media, politikë etj. Në raste të tilla do bëjmë më të mirë për shumicën e njerëzve”, tha ai.
