Ministri i Jashtëm, Ditmir Bushati është takuar sot me homologun e tij maqedonas Nikola Dimitrov.
Pas takimit, të dy ministrat dolën në një konferencë për shtyp, ku dhanë detaje për bisedën e zhvilluar.
Bushati u shpreh se marrëdhëniet mes Shqipërisë dhe Maqedonisë do të forcohen, ndërsa foli për një marrëveshje të arritur në Samitin e Triestes mes dy qeverive në fjalë.
“Në vijim të bisedës së dakordësisë së dy kryeministrave Zaev dhe Rama në Trieste, bëj të ditur se kemi arritur një marrëveshje, për të zhvilluar mbledhjen e parë të qeverisë së përbashkët, gjatë këtij viti. Do të mbahet vjeshtën e ardhshme në Pogradec. Kjo do të jetë me rëndësi për të lehtësuar projektet strategjike, të ndihmuara dhe nga ndërkombëtaret”, tha Bushati.
Ndërkohë, ministri i Jashtëm i Maqedonisë, Nikola Dimitrov, u ndal tek bashkëpunimi konkret mes dy vendeve:
“Është vizita ime e parë në Shqipëri si ministër. Patëm shumë biseda konstruktive me Bushatin. Mendoj se ka shumë potencial për bashkëpunim mes dy vendeve. Ka ura të rëndësishme bashkëpunimi mes vendeve. Kjo do të ndihmojë vendet tona që të ecim përpara drejt integrimit. Duhet të punojmë me vendosmëri si në të gjithë Ballkanin. Vizita e sotme është e një rëndësie të madhe. Kemi rënë dakord që të bëjmë më shumë sesa thjesht deklaratat politike. Dëshirojmë që të kalojmë në projekte konkrete në të mirë të qytetarëve të vendeve tona. Vullneti politik është i rëndësishëm për të realizuar projekte më rëndësi”.
I pyetur lidhur me marrëdhëniet e Greqisë me Maqedoninë Dimitrov tha: “Me padurim pres Presidentin grek që në fund të gushti do të jetë në vizitë në Maqedoni dhe ne duan që të mbajmë marrëdhënie të mira me ta. Mes Maqedonisë dhe Greqisë, me vëmendje dhe dalë nga dalë do të arrijmë sukses, që të jemi përkrahës për njëri-tjetrin.”
Ndërsa sa i përket zvarritjes së ligjit të gjuhës shqipe, ministri i Jashtëm i Maqedonisë u shpreh: “Është një Atdhe i përbashkët për shanse të barabarta për të gjithë. Politika duhet të jetë në dobi të qytetarëve tanë shqiptar. Ligji duhet të jetë në përputhshmëri me kushtetutën dhe do të kalojë në qeveri, Kuvend dhe Komisionin e Venedikut. Sa me të bashkuar të jenë qytetarët, aq më mirë është për Maqedoninë dhe për të gjithë qytetarët tanë”.
