Ministri i Jashtëm, Ditmir Bushati ka dhënë detaje lidhur me nisjen e negociatave për një marrëveshje me Greqinë, gjatë fjalës së tij në Komisionin e Jashtëm.
Teksa tha se ende nuk ka një marrëveshje, ai foli edhe mbi ngërcin e krijuar në kërkimin e autorizimit të presidentit Meta për nisjen e negociatave.
Bushati ritheksoi se nuk është presidenti ai që e jep Plotfuqishmërinë, por ai jep vetëm autorizimin për nisjen e negociatave, ndërsa është ai vetë që jep Plotfuqishmërinë.
Lidhur me konferencën e Metës, ku ky i fundit deklaroi se atij nuk mund t’i bëhet asnjë çështje fakt i kryer, Bushati përgënjeshtroi presidentin teksa tha se e ka vlerësuar atë teksa është takuar edhe para se të takonte Kotzias në Korçë.
Fjala e plotë e Bushatit:
Kushtetuta, ligji apo e drejta ndërkombëtare është shumë e qartë. E para, nuk ka një marrëveshje. E dyta, po ju them, në këtë komision do të gjeni informacione disa herë. Këtu nuk e keni përmend presidentin, prandaj do ju përgjigjem pak më vonë. Këtu keni fol për opozitën, për Kuvendin dhe Shoqërinë Civile. Unë do ju përgjigjem për të gjitha çështjet. Kur të shkojmë drejt një marrëveshje, do krijojmë platformën ku do përfshijmë edhe Shoqërinë Civile.
Presidenti nuk jep plotfuqishmëri. Ligji që keni votuar, e përcakton qartë se kush jep plotfuqishmëri. Presidenti jep autorizimin, ndërsa plotfuqishmëria është kompetencë e Ministrit të Jashtëm. Unë i kam kërkuar presidentit dhënien e autorizimit për fillimin e bisedimeve me Greqinë. Pra, i kam kërkuar autorizimin për të filluar punën konkrete, për të arritur një marrëveshje me Greqinë për këtë çështje. Besoj se nuk është normale që unë të them se cila ka qenë përgjigja ime, apo e presidentit. Na e imponon ligji dhe Kushtetuta që të kemi një bashkëpunim. Unë kam bërë një konsultë, më vjen mirë që presidenti dje tha se jemi takuar, kishte një ndryshim pozitiv nga konferenca e tij e fundit. Kam bërë konsultën me presidentin, edhe para Korçës jam takuar me të dhe e kam informuar se kërkesa do të vijë në rrugë shkencore. E vërteta është se institucionet kërkojnë autorizim për plotfuqishmërinë, apo nga kryeministri për marrëveshjet me jashtë, e cila më pas plotfuqishmërinë e jep ministri i Jashtëm.
