Pak ditë më parë u bë virale në rrjet një video, e cila tregonte se si vjehrri dhe vjehrra kapin “mat” nusen e djalit me të dashurin në krevat. Rasti i së resë nga Librazhdi, e cila u kap në momente intime me të dashurin e saj, ndërsa bashkëshorti ishte emigrant, u komentua gjerësisht në media.
Lidhur me këtë çështje tejet sensitive, Avokatja e Popullit Erinda Ballanca ka folur sot në Komisionin e Ligjeve. 20-vjeçarja nga Librazhdi pohoi se është dhunuar edhe nga familjarët e saj. Marrë shkas nga ky rast, Ballanca u shpreh se shoqëria jonë mbetet një shoqëri e dhunshme. Ajo e cilësoi si një rast të turpshëm.
“Shoqëria shqiptare vazhdon të mbetet shoqëri e dhunshme. Unë që vitin e parë në fjalën e drejtuar Kuvendit, kam deklaruar se dhuna do të sjellë një ashpërsim të gjuhës edhe në nivele të tjera te të rinjtë. Nuk jemi rritur në një ambient të tillë, dhe prapë jemi bërë të dhunshëm.
Vazhdon të mbetet i ulët niveli i kuptimit të tjetrit për mendimin e tij ndryshe. Për rastin e djeshëm, mendoj se është rast i turpshëm, është një rast që na tregon se duhet të marrë fund vlerësimi i personave në përgjithësi dhe grave në veçanti për shkak të seksualitetit të tyre.
Gjithçka ne jemi, sipas shoqërisë shqiptare, formëzohet nga seksualiteti. Unë e mirëpres që edhe ju të keni ndonjë kërkesë konkrete, por marrëdhënia jonë me komisionerin është e shkëlqyer për bashkëpunimin”, tha Ballanca.
