Policia e Burrelit ka vënë në pranga, një 23 vjeçar, i cili ishte i akuzuar për disa ngjarje para një muaj. Ai është akuzuar për armëmbajtje pa leje dhe prishje e qetësisë publike, pasi është përfshirë në një përplasje me armë.
Sipas njoftimit të policisë, i riu kishte kohë që vëzhgohej dhe në momentin që policia ka shkuar ta vendosë në pranga, ai ka përdorur gjithë imagjinatën për të shmangur prangat. Mësohet se në momentin e kontrollit, i riu ka gjetur një hapësirë të vështirë për t’u dalluar, duke u fshehur në tavan, në një hapësirë të ngushtë.
Njoftimi i Policisë:
Një tjetër i kërkuar me rrezikshmëri shoqërore bie në prangat e Policisë. Finalizohet operacioni policor “Stadiumi”. Kapet dhe ndalohet një 23-vjeçar, për veprat penale “Armëmbajtja pa leje” dhe “Prishja e qetësisë publike”. 23-vjecari, i dënuar më parë për veprat penale “Dhuna në familje”, “Vjedhja” dhe “Kundërshtim i urdhrit të punonjësit të Policisë”.
Shërbimet e Komisatiatit të Policisë Mat, pas 1 muaji hetimesh proaktive, nën drejtimin e Prokurorisë ka bërë të mundur zbardhjen dhe dokumentinin e ngjarjes, si dhe identifikimin e autorëve të përfshirë në një konflikt me armë.
Mbi bazën e hetimeve dhe informacioneve të marra, shërbimet e Komisariatit të Policisë Mat bënë lokalizimin e vendodhjes së autorit M. H., 23 vjeç, banues në Burrel dhe në kuadër të operacionit policor “Stadiumi” u bë kapja e tij, i cili kur ka parë që Policia kishte rrethuar banesën e tij është fshehur në tavanin e saj, por pas kontrollit është vënë në prangat e Policisë.
Ky shtetas, në orët e vona të natës së datës 30.10.2019, në afërsi të stadiumit të qytetit Burrel është përfshirë në një konflikt me shtetasin K. Ll., duke qëlluar me armë zjarri në drejtim të tij.
Gjithashtu, është shpallur në kërkim dhe vijon puna për kapjen e shtetasit K. Ll. Vijon puna për gjetjen dhe sekuestrimin e armës së përdorur nga shtetasi i lartpërmendur. Materialet hetimore do t’i kalojnë Prokurorisë pranë Gjykatës së Shkallës së Parë Mat, për veprime të mëtejshme.
