Një 58-vjeçar nga Amerika i cili ishte dënuar me burgim të përjetshëm për vjedhjen e 50 dollarëve, është lënë i lirë nga Gjykata e Alabamës.
Alvin Kennard, vodhi 50 dollarë në një furrë buke përpara 36 vitesh, veprim i cili i kushtoi dënimin me burgim të përjetshëm këtij afro-amerikani.
Gjykata e Alabamës vendosi lirimin e tij, falë një urdhërese që lehtëson dënimet për të burgosurit për krime jo të rënda, për të ulur numrin e të tyre në burgjet e mbipopulluara.
Kennard ishte vetëm 22 vjeç, në kohën kur u dënua maksimalisht nga gjykatësit, si pasojë e tre rasteve për vjedhje. Dënimi i tij erdhi i bazuar në një ligj të ashpër të viteve ’70 “për shkeljet e përsëritura”.
Nga ana tjetër, të afërmit e tij shprehen të emocionuar nga vendimi për lirimin e tij.
“Dua të bisedoj me të, ta dëgjoj çfarë ka qejf të bëjë. Nëse do të punojë, nëse do mbështetjen tonë, ne do bëjmë çdo gjë”, tha një nga familjarët e tij.
Ligji për “krimet e përsëritura” që dënonte automatikisht me burgim të përjetshëm këdo që kryente 3 vjedhje, është ndryshuar rrënjësisht vitet e fundit dhe prej tij kanë përfituar dhjetëra të burgosur.
