Juventus u eliminua një natë më parë nga Champions League pas një penalltie të shndërruar në gol në minutat e fundit nga Cristiano Ronaldo. Kur arbitri anglez akordoi penalltinë lojtarët e “Zonjës së Vjetër” u hodhën mbi të dhe e sulmuan shumë ashpër, më i rëndë ishte reagimi i kapitenit, Gianluigi Buffon, i cili u ndëshkua edhe me karton të kuq. Ndërsa në konferencën për shtyp pas ndeshjes gardiani italian sulmoi ashpër arbitrin duke iu drejtuar me këto fjalë:
“Për të gjykuar në të tilla nivele, duhet të jesh i guximshëm. Nëse gjyqtari nuk ka personalitet, dhe nuk e bën dot diçka të tillë, le të qëndrojë në tribunë me familjen, të blejë patatina dhe të shijojë shfaqjen. Ky arbitër është si një kosh mbeturinash, duhej ta kuptonte katastrofën që po bënte. Nuk mund të vërshëllesh për një episod të dyshimtë, në sekondat e fundit, pasi vret ëndrrat dhe shpresat e shumë njerëzve. Duhet më shumë përgjegjësi të gjykosh në të tilla nivele”, tha Buffon.
Rikthehemi në kohë! Ishte viti 2014, kur Juventus mposhti Roma-n pas një ndeshjeje që pati shumë polemika si brenda ashtu edhe jashtë fushës. Nuk ishte hera e parë që Juventus akuzohej për favorizime nga arbitrat italianë.
“Fituesit gjithmonë e gjejnë një mënyrë, ndërsa humbësit dhe mediokrit gjithmonë e gjejnë një justifikim. Është një shprehje që mund të përshtatet edhe në jetën e përditshme dhe jo vetëm në sport,” ishin fjalët e legjendës italiane.
Ndërsa në vitin 2012 është një ndër ndeshjet më të “shëmtuara”, ku në përballjen Milan-Juventus, Muntarit nuk i quhet një gol i pastër që Buffon e nxjerr nga mesi i portës. Asokohe Buffon shpreheshe: “Edhe nëse do ta kisha parë që topi e kishte kaluar vijën e portës, nuk do ti kisha treguar kurrë gjyqtarit”.
Kujtojmë dhe që Juventus gjithmonë është përfolur në Itali për mbështetjen që ka pasur nga arbitrat dhe kujtojmë dënimin që ka marrë për këtë arsye.
