Plakja e popullsisë, fenomeni i emigracionit dhe rritja e dobët e produktivitetit do të vazhdojnë të jenë faktorë frenues në përshpejtimin e normave të rritjes potenciale të ekonomisë së vendit. Kështu thuhet në raportin e fundit të bërë nga Banka e Shqipërisë për zhvillimet ekonomike të tremujorit të tretë.
Madje thuhet se ekonomia e vendit vijon të rritet poshtë potencialeve të saj dhe se me shumë gjasë ky fenomen do të ky fenomen do të vijojë edhe në periudhën në vijim. Me gjithë tendencën përmirësuese, në terma afatmesëm, norma e rritjes potenciale do të vijojë të mbetet nën nivelin e para vitit 2009, thuhet në raportin e BSH.
Sipas të dhënave zyrtare, në fillim të vitit 2017, popullsia ishte 8 mijë persona më pak se parashikimet e INSTAT-it për këtë vit. Rënia në raport me pritshmërinë ka qenë më fatale për grupmoshën 0-15 vjeç, ku tkurrja ka qenë me 10 mijë të rinj më pak sesa pritej.
Ndërsa nga ana tjetër, të moshuarit po rriten më shpejt. Mbi 60-vjeçarët shqiptarë këtë vit janë 93 mijë më shumë në numër se në vitin 2011 kur u bë Censusi i fundit. Tashmë kjo grupmoshë përbën 18.8 për qind të krejt totalit të popullsisë nga 15.4% që ishte në 2011-n.
Pas një dekade, kur 50-vjeçarët e sotshëm do të dalin në pension, forca e punës do të pësojë tkurrje të madhe duke bërë, që ekonomia e vendit të mos ketë përparësi në këtë drejtim. Këto zhvillime do të diktojnë shumë shpejt tendencat e konsumit dhe shpenzimeve publike.
“Shitjet me pakicë do të duhet të orientohen për shërbimet e moshave të vjetra, që nga ushqimet, veshjet dhe akomodimi, teksa shpenzimet e qeverisë nevojitet të zhvendosen nga shkollat tek qendrat e kujdesit social për të moshuarit. Banka e Shqipërisë referon se, rritja potenciale rezultoi e reduktuar nga 6% në periudhën 2002-2009, në rreth 3% pas kësaj periudhe”, raporton “Monitor”.
Gjithashtu, vlerësimet treguan se ekonomia u rrit nën potencial pas vitit 2008 dhe se hendeku negativ i prodhimit u thellua me kalimin e viteve, duke arritur diferencën maksimale në mesin e vitit 2015. Thellimi i hendekut të prodhimit u shoqërua nga një rritje e normës së papunësisë mbi atë natyrore, nga një ngadalësim i investimeve dhe nga kontribute mjaft të ulëta të produktivitetit në rritjen ekonomike.
Vlerësimet kanë treguar se reduktimi i ritmit të rritjes ekonomike ishte kryesisht një fenomen strukturor. Si i tillë, ai u shkaktua nga ngadalësimi i ritmit potencial të rritjes ekonomike, si pasojë e kushteve financiare të pafavorshme dhe e nevojës për ndryshime të thella strukturore në ekonomi.
Ndërkohë që reduktimi reflektonte vetëm pjesërisht një fenomen ciklik, të shkaktuar nga kërkesa agregate e pamjaftueshme për të nxitur shfrytëzimin e plotë të kapaciteteve prodhuese të vendit, teksa fenomeni i plakjes së popullsisë dhe emigracioni shihet të kenë një rol madhor në shfrytëzimin e potencialeve ekonomike të vendit.
